Tate St Ives -taaiđâmuseo Cornwallist Ovtâstum kunâgâskoddeest lii váldám pissoo nurâlduvâsis kyehti taaiđâtyeje, maid Outi Pieski (Čiske-Jovsset Biret Hánsa Outi) lii tuoijum. Outi Pieski lii vuossâmuš sämmilâš taaiđâr, kiän taaiđâtyejeh láá väljejum Tate St Ives -taaiđâmuseo nurâldâhân. Koččâmâšâst leijee tyejeh láá Guržot ja guovvsat / Spell on You! (2020) já Skábmavuođđu / Spell On Me! (2024), mon Outi Pieski raahtij eromâšávt čáitálduv várás pääihi alne Tate St Ives Pothmeor Studiosist uđđâivemáánust 2024. Outi Pieski muštâl, ete taah tyejeh kovvejeh jiegâlii meeci.
Outi Pieski lii šoddâm Helsigist ive 1973, já sun áásá tääl Ucjuuvâst. Suu vuossâmuš stuorrâ čáitáldâh Tate St Ives -taaiđâmuseost lehâstui kuovâmáánu 10. peeivi, já tot nuuvâi vyesimáánu 8. peeivi. Tate St Ive -taaiđâmuseo jođetteijee Anne Barlow valjij Outi Pieski čáitálduv museon, já sun lii meid iällám Outi Pieski lunne Ucjuuvâst. Čáitálduvâst lijjii Outi Pieski máálám enâdâhtaavluh já stuorrâ tekstiilstelliittâsah, maid Pieski jieš nabda kuulmâuulâtlâžžân maalâkovveen.
Tate St Ives -taaiđâmuseo lii lasseetmin algâaalmugij taiđuu jieijâs čáitálduvváid. Anne Barlow muštâl, ete museo áigu skappuđ eres-uv sämmilijd taaiđâtuojijd nurâldâhân puátteevuođâst. Suu mielâst Outi Pieski lii ohtâ tááláá ääigi pyeremuin já mielâkiddiivumosijn taiđârijn maailmist. Outi Pieski taiđust tiättojeh äigikyevdilis já sämmiláid lohtaseijee fáádáh, tego pirâsääših já eennâmvuoigâdvuođah.
Maria Balshaw, Tate-museoi viärmáduv jođetteijee, eelij meid tiervâtmin Outi Pieski, ko suu čáitáldâh lâi Tate St Ives -taaiđâmuseost. Taiđârân lii eromâš vuámášittee tábáhtus, ko suu tyejeh váldojeh Tate St Ives -taaiđâmuseo nurâldâhân, já Outi Pieski muštâl, ete taat lii suu karrieer alemus puddâ.
Käldeeh:
– Maineikas Tate-galleria valitsi Outi Pieskin taidetta pysyvään kokoelmaansa: ”Nykyajan voimakkaimpia taiteilijoita” (yle.fi)
– Outi Pieski (www.tate.org.uk)
– Guržot ja guovssat / Spell on you! (www.outipieski.com)
Kove: Richard Penn (Wikimedia Commons)