Vyesimáánu 26. peeivi 2024 tollui šoŋŋâdâhsymposium Anarist Sajosist. Tom uárnejii AHR ađai alemus haldâttâhriehti já Sämitigge. Symposium ulmen lâi kieđâvuššâđ šoŋŋâdâhnubástus, pirâskoččâmušâid já eennâmkevttim sämikuávlust. Symposium lâi tollum Euroop union -enâmij aaleeb haldâttâhtuámustovli tuámáráid.
Šoŋŋâdâhsymposiumist savâstâllui tast, maht luándu maaŋgâhámásâšvuođâ kiäppánem vaaigut sämmilij elimân. Kiäppánem vaaigut sehe iäláttâssáid já sämmilii puásuituálu eennâmkevttimân lohtâseijee lavváid já riehtiprinsiipáid. Luándu maaŋgâhámásâšvuođâ kiäppánem vaaigut meid šoŋŋâdâhtoimáid arktisii kuávlust.
AHR já Sämitige ornim šoŋŋâdâhsymposiumist lijjii suullân 60 kyessid ACA-Europest, ađai EU staatârääđi já alebij haldâttâhtuámustovlij littoost. Kyesih lijjii ACA-Europe jeessântuámustoovli presidenteh, saavâjođetteijeeh já tuámáreh. Tilálâšvuođâst sahâvuáru tooláin Sämitige saavâjođetteijee Pirita Näkkäläjärvi já aairâs Inka Musta.
Pirita Näkkäläjärvi muštâlij eres lasseen tast, ete: ”Lii tehálâš savâstâllâđ syemmilii já eurooplii ohtsâškode kuávdáš tuáimeigijn. Mij tuáivup, ete mij puávtáččijm pyehtiđ EU-enâmij alemuid haldâttâhtuámustovlijd vuáđulijd tiäđuid sämmilij eellimvyevist, kuulmâ Suomâst sarnum sämikielâst já puoh ärbivuáválijn iäláttâsâin, moi suojâlem já ovdedem lii eellimiähtun sämmilij algâaalmug puátteevuotân.”
ACA-Europe joođhij čuákkimijdis vala vyesimáánu 27. já 28. peeivij Anarist. Symposium kulá ACA-Europe kyevti ive kukkosii saavâjođetteijeepaje čuákkimij ohtâvuođâst uárnejum sierâtilálâšvuođáid.
Käldee:
– KHO ja Saamelaiskäräjät järjestivät ilmastosymposiumin EU-maiden tuomareille (samediggi.fi)
Kove: Ville-Riiko Fofonoff / Sámediggi | Saamelaiskäräjät