Finna.fi-uuccâm­palvâlus tääl finnimnáál meid tave­sämikielân

Sämikielâ digitaalliih palvâlusah puáránii, ko kulttuur- já tieđâuuccâmpalvâlus Finna.fi vijđedij palvâlusâs tavesämikielân vyesimáánu 15. peeivi. Tääl piäsá tutkâđ já uuccâđ ovdâmerkkân museoi, arkkâduvâi já kirjerájui materiaalijd nuuvtá siämmáá palvâlusâst tavesämikielân. Finna-palvâlus peht kávnojeh ovdâmerkkân sämikielâliih loostah, sämikielâlâš kirjálâšvuotâ sehe sämimuusik.

Kirjerájui lasseen maaŋgah arkkâduvah já museoh láá lehâstâm Finnan jieijâs nurâlduvâid. Finna-palvâlusâst kávnojeh ovdâmerkkân koveh, tävireh já taaiđâtyejeh, moid mudoi pesâččij uápásmuđ tuše museoin teikkâ arkkâduvâin pääihi alne. Palvâlusâst puáhtá uuccâđ ovdâmerkkân fáddásanijguin teikkâ ulmuu- já päikkinomâiguin. Materiaaleh kávnojeh uásild njuolgist uuccâmpalvâlus peht já uásild tuše kirjeráájust pääihi alne.

− Tavesämikielâ uuccâmpalvâlus tuárju sämmilij kielâlii já kulttuurlii oovtâviärdásâšvuođâ, já ton áánsust sämikielah láá pyerebeht uáinusist ubâ Suomâst. Paijeel 60 prosentid sämmilijn ääsih sämikuávlu ulguubeln. Lii uáli jo pyeri, et tääl mij peessâp uápásmuđ jieččân kulttuurärbivyehimateriaaláid já kevttiđ kirjerájupalvâlusâid jieččân eenikielân aassâmsaajeest peerusthánnáá, muštâl tiätuäššitobdee Mari Guttorm Aalmugkirjeráájust.

Sämitige stivrâjeessân Tauno Ljetoff mielâst Finna.fi-palvâlus almostittem tavesämikielân lii tehálâš lävkki ovdâskulij.

− Aalmugkirjerááju lii čáittám, maht ucebeh-uv kielah ánsášeh oinuđ já kulluđ, já mon tehálâš lii pyehtiđ kevttiđ palvâlusâid jieijâs kielân. Mun oskom, et taan almostittem keežild ulmuuh usâškyetih herkibeht tiäđuid jieijâs suuvâin, madârvanhimijn, päikkikuávlust já tävirijn. Puávtáččij jurdâččiđ, et Finna.fi materiaaleh puátih tääl moinnii naalijn maassâd, aldeláá sämmilijd.

Finna-palvâlusâi jurgâlus pajekielân lii uási Aalmugkirjerááju ”Sämikielâi toorjâ digitaallijn palvâlusâin” -haavâst, mon ruttâd Alfred Kordelin ruttârááju. Tavesämikielâlii palvâlus piäsá kevttiđ taan liiŋkâ peht.

Käldeeh:

– Sámegielat digibálvalusas beasat dál ohcat govaid, museaid ja arkiivvat materiálaid (yle.fi)

– Finna.fi laajentaa palveluaan pohjoissaamenkielisille (www.kansalliskirjasto.fi)

Kove: Jasmina Schreck

Kommenteh

Čääli komment

Čääli komment.
Čääli noomâd teehin.

Luuvâ meid

Uđđâsumos uđđâseh

Anarâškielâ servi vuábdá uđđâ pyevtit­tâsâid 40‑ive juhlestis

Anarâškielâ servi juhlo 40 ive tooimâs majebaargâ skammâmáánu 24. peeivi Anarist. Juhle ohtâvuođâst vuábdojeh uđđâ pyevtittâsah. Vyebdimnáál láá seehah, pääiđih já puttâleh, moid lii...

Sämikielah tarbâšeh dynaamisii kielâkártá

Sämikielâin mij puohah tiettip motomijd faktaid – ovdâmerkkân tom, et puoh sämikielah láá eenâb teikâ ucceeb uhkevuálásiih, já tom, et sämikielâi sárnooh ääsih sehe...

Säminuorâi taaiđâ­tábáhtus uárne­juvvoo Heta škoov­lâst kiđđuv 2027

Jyehi-ihásâš Säminuorâi taaiđâtábáhtus uárnejuvvoo puáttee ive Heta škoovlâst Iänuduvvâst cuáŋuimáánu 29. peeivi. Iänuduv kieldâ tiävdá puáttee ive 150 ihheed, já taaiđâtábáhtus lii uási juhleive...

Tutkâmuš: Lodde­čaasij tipšo­mist lii ävkki, mut tipšo­tooimah tarbâ­šuuččii eenâb

Čäciloddenäälih láá kiäppánâm merhâšitteht Suomâst majemui luuvij iivij ääigi. Helsig ollâopâttuv já Suomâ pirâskuávdáá totkeeh selvâttii, maht loddečaasij tipšom já suojâlem láá vaiguttâm čäcilodde­naalijd...

Sämikielâi tutkâmuš oovdân­puohtui aalmugij­koskâsii sympo­siumist Bodøst

Čiččâd Saami Linguistics Symposium, SAALS7, čokkij sämikielâi totkeid já motomijd eres-uv ucceeblovokielâi äššitobdeid Tave-enâmij ulguubeln-uv Taažâ Bodøn skammâmáánu 4.–5. peeivi. Nord-universitet-ollâopâttuv čokkim ohjelm faalâi...