Ive 2023 ruonâsin lii väljejum porkkan. Tot lii pivnohis ruonâs syemmilâš kievkkânist tondiet ko tom puáhtá kevttiđ maaŋgânáál. Porkkaneh láá häälbih, njálgáh já tiervâsliih. Ive ruonnâs láá valjim Puutarhaliitto já Kotimaiset kasvikset ry.
Suomâst porkkanijd viljâleh áámmátlávt suullân 300 šaddokärdi-irâtteijed paijeel 1 700 hehtaar piälduvijđoduvâst. Vááijuv 40 irâttâssâd viljâleh luánáporkkanijd. Porkkan lii pottáás maŋa pivnohumos ruonâs Suomâst, já jyehi ive tot porroo oovce kiilud per olmooš. Vyebdimist leijee porkkaneh láá táválávt Suomâst šoddâdum. Porkkanšaddovalje ive 2021 lâi 75,5 miljovn kiilud, mast uási toimâttui ráhtulâšvuotân mälistemamnâsin.
Viljâleijee uáinust porkkan ij lah älkkeemus ruonâs šoddâdiđ, tastko tot taarbâš rievtislágán eennâmšlaajâ. Njajâ- já keđgienâmeh iä tuhhii šoddâdmân, tastko tobbeen porkkaneh iä šoodâ njuolgâdin. Mote-enâmeh já lavtâsvuođâ pyereest tuállee čunoienâmeh láá pyeremuuh šoddâdemsajeh. Njuoskâdem ferttee leđe oornigist, já viljâleijee kalga meid váruttiđ tiivrijn, amas toh pillediđ šaddovalje. Vuorkkim kalga tábáhtuđ rievtisnáál, amas porkkaneh timániđ. Toh kalgeh siäiluđ kiiđâ räi. Kulâtteijee haalijd njuálguporkkanijd, moh láá assaah já mudágávt korrâseh ko taid kääskist.
Käldee:
– Porkkana on vuoden 2023 vihannes! (www.kasvikset.fi)
Kove: Pexels (Pixabay)