Stuorrâ-Britanniast tomatteh, paprikah já kuurkah láá vääniht, muštâl uđâstoimâttâh Reuters. Pirâsminister Teherese Coffey mield taat tile pištá vala muáddi oho teikâ máhđulávt mánuppaje-uv. Sun ávžoo uuccâđ muulsâiävtuid väniruonâsáid já puurrâđ páihálijd ruonâsijd tego navrâsijd, moh láá valjeeht.
Minister Coffey mield suijân ruonâsij vänivuotân láá pajanâm energiamáávsuh Britannia já Vuáládâhenâmij šaddoviistijn. Tondiet ruonâseh iä lah šoddâdum siämmáá ennuv ko táválávt. Ton lasseen Tave-Afrikist já Maadâ-Euroopist lii lamaš hyeneeb šaddopaje. Stuorrâ purrâmušpuovtâdeijeefirmah láá tondiet asâttâm raijiittâsâid väniruonâsij uástimân.
Minister lasettij, et sun ibbeerd kulâtteijei jurduid: sij láá hárjánâm finniđ tiätu purrâmušâid käävpist ubâ ääigi.
NOS mield meid Vuáládâhenâmijn ruonâseh láá tivrom čuuvtij. Pajanâm kaasuhade já kolmâ šooŋâi keežild šoddâdum ruonâsmereh láá ucebeh ko táválávt. Ovdâmerkkân smavvâ kukkákaalâ sáttá mäksiđ 3,50 euro. Uásturaijiittâsah iä lah, mut sálttáás hadeh stivrejeh uástim: ulmuuh väljejeh talle eres ruonâsijd, jis tiäturuonâs lii sii mielâst meendu tiivrâs. Meiddei Vuáládâhenâmijn vuárdoo uđđâ šaddopaje.
Käldeeh:
– Can’t get tomatoes? Let us eat turnips, UK minister says (www.reuters.com)
– Groente steeds duurder: ’Bloemkool van 3,50 is wel schrikken’ (www.nos.nl)
Kove: Lubos Houska (Pixabay)