Uđđâvuođâpeeivi Japanist lii adelum tsunamiváruttâs. Suijân toos láá korrâ eennâmtuárgástusah Jaapaanmeerâ alne. Jaapaan meterorologisâš virgádâh almottij Ishikawa já ránnjáprefektuurij riddoost tábáhtum korrâ eennâmtuárgástusâst, mon intensiteet lâi 7,6 Richter ciäkkáduvâst. Eennâmtuárgástusâi čuávumuššân nyevt meetter alosâš tsunami teeivâi motomijd oosijd Jaapaanmeerâ riddokuávlust.
Virgeomâhááh láá adelâm tsunamiváruttâsâid korrâ eennâmtuárgástusâi keežild já koččom ulmuid evakuistiđ jieijâs já perrus aleláá leijee kuávloid, muštâlij aalmuglâš radio NHK ton maŋa ko eennâmtuárgástus lâi teivâm Noto njaargân Ishikawa prefektuurist. ”Mij iberdep, et tii päikki já omâdâh láá tivrâseh tijjân, mut tii jieggâ lii tergâdub ko mihheen eres. Kaččâđ nuuvt ollâ kuávlun ko máhđulâš,” NHK jođetteijee lasettij.
Kuávlust láá tubdum ohtsis 21 eennâmtuárgástussâd, moi intensiteet lii lamaš paijeel 4 Richter ciäkkáduv mield. Maaŋgah váldumaađijeh láá kiddejum. Huáppujunájotolâh Tokio já Ishikawa prefektuur kooskâst, kogo vuáimálumoseh eennâmtuárgástusah tobdojii, lii kiddejum, muštâl Japan Railways. Maaŋgâi energiatoimâtteijei mield paijeel 30 000 tálutuállud láá tääl šleđgâittáá.
Tsunamih vyerdimist
Jaapaan šoŋŋâtiettuu lágádâs mield paijeel viiđâ meetter alosiih pároh sättih teivâđ eennâmtuárgástuskuávloid. Kuálhismeerâ tsunamiváruttâskuávdáš PTWC váruttij, et varâliih tsunamipároh láá vyerdimist meid nyevt 300 kilomeetter siste episentrumist Jaapaan riddokuávluin. Viestârkuávlu riddoid adeluvvojeh tuáistáážân vyeligub váruttâskoodih: tobbeen vuárdojeh tulvepároh, moh láá oovtâ já kuulmâ meetter kooskâst. NHK mield tsunamipároh sättih maccâđ maŋgii-uv peeivi ääigi.
Váimusvyeimilágádâs riskâkuávlust
Lii meid lamaš vyerdimist, et suullân kuulmâ meetter alosâš tsunami teivâččij Niigatan, mii lii Jaapaanmeerâ stuárráámus kaavpug. Ton kuávlust lii meid váimusvyeimilágádâs, mon omâsteijee lii almottâm, et aainâskin vala kuávlust iä lah vuottum ollâ pároh eennâmtuárgástus keežild.
Tullâriegis
Jaapaan suáloi lii Kuálhismeerâst nuuvt kočodum ”Tullâriäggást”, kost eennâmtuárgástusah já tullâvärirusomeh láá táváliih nannaamráptui lihâdem keežild. Jaapaan lii hárjánâm eelliđ tágárij luándualmoonmijgijn, já ovdâmerkkân huksimnoormih láá čovgâdeh, vâi rakânâsah killájeh eennâmtuárgástusâid. Meiddei ulmuuh láá škuávlejum eennâmtuárgástusâi várás.
Majemuu tove Japanist sattui korrâ eennâmtuárgástus njuhčâmáánust 2011, já ton čuávumuššân ollâ tsunami teeivâi tavenuorttii pele riddokuávlun. Taan keežild 18 000 olmožid hevvânii. 2 500 ulmuu rummâšeh iä lah kuássin kavnum. Taat tsunami tovâttij meid váimusvyeimilágádâs päärti Fukushimast, mii lâi viärráámus Tšernobyl 1986 maŋa.
Käldee:
– Tsunami-alarm in Japan, ‘golven tot 5 meter’ na reeks heftige aardbevingen (www.ad.nl)
Kove: Hans (Pixabay)