Ovtâstum aalmugij (OA) škovlâmielkkipeivi viättoo čohčâmáánu 27. peeivi. Škovlâmielkkiohjelmijn lii kuávdáš roolâ párnái tiervâslii piämu oovdedmist. Piäiván uásálisteh škoovlah pirrâ maailm.
Suomâst láá finnimnáál pyereh mielkkipyevtittâsah jyehi smaakân. Mielkki siskeeld ennuv proteiin, kalsium, fosfor, kalium, jodi sehe B6- já B12-vitamiinijd. Mielkki lii pyeri tagarin ko tot lii, mut määlistmist puáhtá kevttiđ meiddei jieškote-uvlágánijd mielkkipyevtittâsâid.
”Mielkki juhhoo távjá purâdem ohtâvuođâst, mut tot puáhtá meiddei leđe uássin párnái peivipitá škoovlâ maŋa”, muštâl purrâmušmarkkânäššitobdee Heidi Siivonen MTK:st.
Suomâst mielkkipyevtittem lii uáli jo tehálâš. Vuolgâsajeh mielkkipyevtitmân láá pyereh, tastko kuusâi fuođârin kevttum rääsi šadda Tave-Suomâ räi.
”Syemmilâš mielkkipyevtittem lii oovdâstjottee kilelis pyevtitmist. Mielkkitááluin, uásádâhkuudijn já meijerijn pargoo juátkojeijee ovtâspargo, mon ulmen lii kepidiđ luáštuid, šoddâdiđ čiđâčoonnâm, lasettiđ luándu maaŋgânálásâšvuođâ já ovdediđ ellei pyereestvaijeem”, iätá äššitobdee Marjukka Mattio.
Škovlâmielkkipeeivi kunnen Siivonen juovij jieijâs peivipittásmoothie reeseept, moos tarbâšuvvojeh el. myerjih já haavvârsuvrâmeh.
PEIVIPITTÁSMOOTHIE
4 meripitá
Amnâseh
Myerjih (om. sareh já vađukkááh): 4 dl
Rahka: ½ prk
Haavvârsuvrâmeh: ½ dl
Mielkki: 2–3 dl
(sukkâr teikâ mietâ)
Valmâštemravvuuh
- Njuvde muorjijd piähtusiävutteijein já leškist valmâš njuvdos neelji laasân.
- Piejâ loopâid amnâsijd piähtusiävutteijei já siävut tassaažân ko šadda täsivis smoothie.
- Smakkii já lasseet sukkâr teikâ mieđâ táárbu mield.
- Piejâ valmâš smoothie myerjinjuvdos oolâ siävuthánnáá. Te peivipittá lii vaalmâš.
Käldee:
– Tänään vietetään koulumaitopäivää – poimi herkullinen välipalasmoothieresepti talteen (www.maaseuduntulevaisuus.fi)
Kove: Imo Flow (Pixabay)