Anarâš aavis vuálgá fáárun Amsterdamân Stuorrâ Euroviisuh-juuhlán skammâmáánu 16. peeivi. Taat juhle tuálloo Ziggo Dome -sisareenast, kuus čäähih maksimaallávt 17 000 olmožid ohtân siisâ. Taan eehid ääigi Euroviisuh-lávlumkištohistorjá kirkkâdumos noomah čokkâneh juhlođ jyehi-ihásii tábáhtume muusikäärbi. Meid uccâ sämikielâš lii valdum pyereest vuástá ucceeblovo media ovdâsteijen.
Taat historjálâš juhle-eehid šadda siämmáámuđusâžžân ko ive 2022 juhle-eehid-uv lâi: talle suullân 30 ovdebáin Euroviisuin pyereest piergim artistid lävkkejii läävdi oolâ jieijâs euroviisupittáin. Eehid loppeed muusik, energia já jiäráskittee tábáhtume.
Puoh läävdi oolâ lävkkejeijee artisteh iä lah vala almottum, mut kiähnii láá jo tiäđust. Eehid stuorrâ nommân lii irlandlâš artist Johnny Logan, Mr. Euroviisuh jieš, kote lii vuáittám lávlumkištoid kulmii. Vuosmustáá sun vuoitij ive 1980 eidu Amsterdamist pittáin What’s Another Year? já nube kerd Brysselist ive 1987 pittáin Hold Me Now. Kuálmád keerdi Linda Martin vuoitij Euroviisuid ive 1992 Malmöst Johnny Logan lavluin Why me? Taan puoh miänástus lasseen Johnny Logan lii vala puáttám nubben ive 1984 Luxemburgist pittáin Terminal 3.
Skandinaavisiih noomah láá pyereest fáárust ehidist. Ohtân artistin lii Taažâ ovdâsteijee Alessandra, kote ovdâstij taan ive enâmis pittáin Queen of Kings, já taat laavlâ poođij viđâdin. Nubben pegâlmâs nommân fáárust lii ruátálâš Måns Zelmerlöv, kote vuoitij Euroviisuid ive 2015 pittáin Heroes. Meiddei syemmilâš Käärijä, kote poođij taan ive nubben pitáinis Cha cha cha, lii fáárust. Sämmilâš uáinust mielâkiddiivâš lii čuávvuđ Taažâ ive 2019 euroviisuovdâsteijee KEiiNO, kote čuojâttij meid taan ive Ijâttes iijâst Anarist. Vyerdimist KEiiNO lávlu aainâs-uv jieijâs muusikpitá Spirit in the Sky, mii poođij kuđâdin jieijâs kištoive. Taan pittáást Fred Buljo juáigá, mut laavlâ lii mudoi eŋgâlâskielân.
Stuorrâ Euroviisuh-juhle läiđejeijen tuáimá vuáládâheennâmlâš karismaatlâš lávloo Edsilia Rombley, kote ovdâstij Vuáládâhenâmijd Euroviisuh-lávlumkištoin ive 1998 pittáin Hemel en aarde (Alme já eennâm) já poođij niäljádin.
Käldee:
– Het Grote Songfestivalfeest (www.ziggodome.nl)
Kove:Marja-Liisa Olthuis