Orpo haldâttâs algâttij pargoos majebaargâ kesimáánu 20. peeivi. Uđđâ haldâttâsâst láá nelji piäláduv: Aalmuglâš Kokoomus, Vuáđusyemmiliih, Suomâ ruátálâš aalmugpiäládâh já Suomâ Ristâlâšdemokraateh. Haldâttâspiäláduvâin láá tienuuvt ohtsis 108 saijeed ovdâskoddeest ađai käävci saje iänádâh. Ovdâskoddepiäláduvâin opposition pääcih Suomâ sosialdemokraatlâš piäládâh, Suomâ Kuávdášpiäládâh, Ruánáá litto, Čižetlitto já Liike Nyt.
Haldâttâs uáiviministerin lii stuárráámuu haldâttâspiäláduv ađai Aalmuglii Kokoomus saavâjođetteijee Petteri Orpo. Eres ministereh láá ovdâmerkkân staatâriggodâhminister já uáiviminister sajasâš Riikka Purra, olgominister Elina Valtonen, máttááttâsminister Anna-Maja Henriksson sehe eennâm- já meccituáluminister Sari Essayah. Ministereh láá ohtsis 19: käävci Aalmuglii Kokoomusist, čiččâm Vuádusyemmilijn, kyehti Suomâ ruátálii aalmugpiäláduvâst já ohtâ Suomâ Ristâlâšdemokraatijn. Ton lasseen lihâdem-, valastâllâm já nuorâkerdiminister toimâ lii juohhum Suomâ ruátálii aalmugpiäláduv já Suomâ Ristâlâšdemokraatij kooskâst nuuvt, ete minister puátá Suomâ ruátálii aalmugpiäláduvâst vuosmui kyevti ive ääigi já Suomâ Ristâlâšdemokraatijn majemui kyevti ive ääigi.
Haldâttâs finnij haldâttâhráđádâlmijd valmâšin já almostitij haldâttâsohjelmis moonnâm tuorâstuv. Ton maŋa haldâttâspiäláduvâi merideijee orgaaneh tuhhiittii haldâttâsohjelm já meridii, ete sij uásálisteh-uv haldâttâsân. Suomâ Ristâlâšdemokraateh nomâttii ministeris lávurduv, Aalmuglâš Kokoomus já Vuáđusyemmiliih pasepeeivi já Suomâ ruátálâš aalmugpiäládâh majebaargâ.
Uđđâ haldâttâs tárguttâssân lii nanosmittiđ staatâ ruttâtuálu kuuđâ miljard euro verd, mast nelji miljard šodâččii njuolgist šiäštuin já loopah kyehti miljard eres tooimâin, ovdâmerkkân pargolâšvuođâ lasettem peht. Merhâšitteemuuh šeštimtooimah láá 1,1 miljard euro pyereestvaijeemkuávlui toimâvuovij pehtilittem já muttem sehe 1,2 miljard euro kepidem sosiaaltorvoost já -ovdâdâsâin. Ton lasseen ulmen lii šeštiđ indeksáid čonâsist leijee manoid suullân 0,5 miljard eurod. Meid ovdánemovtâspargoost lii puátimin 343 miljovn euro čuoppâm.
Haldâttâs áigu meid kepidiđ motomijd viäruid. Ovdâmerkkân puátuviäruttâs kiäppán ohtsis suullân 400 miljovn euro verd, enâmustáá uccâ- já koskâtienâsáid. Meid puáldimamnâsviäruttâs kiäppán, já tondiet staatâ moonât suullân 100 miljovn eurod viäruruuđâid. Haldâttâs áigu kompensistiđ monâttum viäruruuđâid jieškote-uvlágánij háittuviärui čovgiimijguin. Ton lasseen motomeh 10 prooseent árvulaseviäru vyelni leijee palvâlusah já pyevtittâsah sirdojeh 14 prosentân. Tágáreh láá ovdâmerkkân talkkâseh, lihâdempalvâlusah sehe kulttuur- já makkuuttâstilálâšvuođah.
Ohjelm lii finnim mottoom verd kriitiik. Ovdâmerkkân oppositiost leijee Suomâ Kuávdášpiäláduv saavâjođetteijee Annika Saarikko kritisistij pyereestvaijeemkuávlui šeštimtooimâid epičielgâsin. Suu mielâst haldâttâsohjelmân ličij kolgâm čäälliđ čielgâsubbooht, ete maht šiäštuh šaddeh. Sun lâi meid huolâstum tast, maht sosiaaltorvo čuoppâmeh vaigutteh páárnášperrui iälámâšân. Meid árvulaseviäru lasanem lihâdâspalvâlusâin lii finnim kriitiik tondiet ko viärui pajedem paijeed meid palvâlusâi hoodijd. Siämmást haldâttâs ulmen ličij finniđ syemmilijd lihâdiđ. Haldâttâs lii kuittâg-uv aalgâtmin Suomâ joton -kampanja, mon tárguttâssân lii lasettiđ lihâdem puoh oovijn. Árvulaseviärui pajedem almolávt lii finnim positiivlijd kommentijd ekonomistijn.
Uđđâ haldâttâsâst lii meid tárguttâssân kieđâvuššâđ uđđâsist oovdeb Marin haldâttâs ääigi kománâm sämitiggelaavâ. Suomâ ruátálii aalmugpiäláduv saavâjođetteijee já máttááttâsminister Anna-Maja Henriksson eeđâi tieđettemtilálâšvuođâst, ete iävtuttâs uđđâ laavâst ličij tárguttâs finniđ valmâšin jo taan ive peln. Henriksson mieldi uđđâ sämitiggemyenster ličij viehâ siämmáálágán ko Marin haldâttâs iävtuttâs laavâst. Suomâ lii finnim OA:st maaŋgâid láittusijd, moh kyeskih sämmilij vuoigâdvuođáid. OA näliolgoštem- já olmoošvuoigâdvuotâkomitea lii meridâm, ete Suomâ kolgâččij mutteđ laavâ nuuvt, ete tot kunnijât sämmilij jiešmeridemvuoigâdvuođâ algâaalmugin.
Käldeeh:
– Hallituksella on kovat taloustavoitteet – soteleikkaukset ja työllisyystoimien läpimeno epäilyttävät professoreita (yle.fi)
– Saarikko: ”Viesti on epäselvä” (yle.fi)
– Kuntosaliyrittäjä tyrmää arvonlisäveron noston ja ennustaa ongelmia: ”Vaikuttaa helpolta ja lyhytnäköiseltä ratkaisulta” (yle.fi)
– Mitä tapahtuu sen jälkeen, kun hallitusohjelma on valmis? Näin asiat etenevät (www.hs.fi)
– HS:n tiedot: Työn verotus kevenee puolella miljardilla eurolla, muun muassa lääkkeiden ja kulttuuritilaisuuksien arvonlisävero nousee (www.hs.fi)
– Näin ekonomistit kommentoivat hallitusohjelmaa – kiitosta etenkin alvien nostosta (www.hs.fi)
– Hallitusohjelma on valmis – Saamelaiskäräjälaki takaisin pöydälle (www.iltalehti.fi)
Kove: AI Leino (Pixabay)