Tamperelâš jieŋâskiärrujuávkku Tappara lii vuáittám taan ive jieŋâskiäru suomâmiäštárvuođâ, ko tot juuvsâi niäljád vuáitus fiinaalrááiđust Lahti Pelicans vuástá moonnâm oho tuorâstuv. Loppâloopâst Tappara vuoitij fiinaalrááiđu viehâ čielgâsávt 4–1 já siämmást seervi historjá oovcenubálovváád miäštárvuođâ, mii lii meid ubâ Liiga ulâttâs. Tappara lii mudoi-uv miänástum uáli pyereest SM-liigast, ko tot lii vuáittám moonnâm käävci paje ääigi joba neljii ađai pele miäštárvuođâin. Miitaalsoojij ulguubel Tappara lii pááccám moonnâm love ive ääigi tuše paje 2020–2021.
Veik Pelicans ij miäštárvuođâ taan paje luhostumgin vyettiđ, te nubbe saje ij lamaš ollágin hyeni – eromâšávt jis váldoo huámmášumán seervi puáđushistorjá. Pelicans lâi nomâlâssân juksâm tuše oovtâ miitaalsaje paijeel 30-ihásii historjás ääigi ovdil taan ive. Pelicans táppái 4–1 ive 2012 finalist jyväskylälii JYPân.
Veik Tappara vuoitij ubâ fiinaal čielgâsávt, lâi majemuš speelâ uáli čoovgâs. Tappara finnij vuosmuu moolâs jo váhá paijeel miinuut speelâ aalgâ maŋa, ko tot peesâi Pelicans keejist jotelis vyestivollitmân, mast Valtteri Merelä adelij skiäru Anton Levtchin, kote luhostui moolâ časkemist. Tappara paajij vuosmui čiččâm miinuut ääigi ohtsis kulmâ moolâ. Kyehti maajeeb moolâ pajijn Kristian Tanus já Casimir Jürgens. Pelicans kuittâg-uv peesâi speelân fáárun vuosmuu uási nube peeleest Topias Vilén já Ben Blood moolâi keežild. Nubbe uási lâi iänááš molâttem, mut ton loopâst ääigist 39.01 Pelicans Ilkka Kangasniemi luhostui tassiđ speelâ Tappara ráŋgáštâs ääigi.
Kuálmád uási aalgâst Pelicans 20-ihásâš volliitteijee Aatu Jämsen jávuttutij tamperelijd keččeid, ko suu tärhis paccâm teeivâi Tappara moolâ paječiehân ääigist 44.14. Pelicansist soođâi speelâ jođetteijee, veik tot lâi lamaš kuulmâ moolâ vyejettemtiileest. Eidusâš spellâmäigi nuuvâi dramaatlávt, ko Tappara vuoitij algâttâs oovce sekuntid ovdil uási loopâ, já Veli-Matti Savinainen stivrij Valtteri Kemiläisii čuovjissärgispaccâm moolân tuše seekunt ovdil speelâ loopâ. Jotkâääigist Tappara ruátálâš volliitteijee Marcus Davidsson čooskij moolâ ääigist 68.57, já nuuvt Tappara vuoitij sehe speelâ já suomâmiäštárvuođâ.
Käldeeh:
– Tappara nujersi tiukasti taistelleen Pelicansin ja tarrasi mestaruuteen (www.hs.fi)
– Tappara on Suomen mestari! (www.iltalehti.fi)
Kove: Jill Wellington (Pixabay)