Sämitigge lii asâttâm kulmâ uđđâ lävdi­kode sämmilij jieš­haldâšem naanood­mân

Sämitigge asâttij taan ive kuálmád čuákkimstis uđđâ pargo-oornig mield kulmâ uđđâ lävdikode loppâvaaljâpajan. Uđđâ lävdikodeh láá arâšoddâdem­lävdikodde, aalmugijkoskâsij algâaalmug- já EU‑aašij lävdikodde sehe tutkâmeettisâš rääđi. Sämitigge muštâlij ääšist tiäđáttâsâstis kesimáánu 18. peeivi.

Lävdikuudij jesânij valjiimist váldojii huámášumán sämmilij kielâlâš já kuávlulâš ovdâstus sehe jesânij šiev äššitubdâmuš jieijâs toimâsyergist. Sämitige saavâjođetteijee Pirita Näkkäläjärvi lii tuđâvâš uđđâ lävdikuddijd.

– Mun lam ilolâš tast, ete nuuvt maŋgâ sämmilii aalmuglâšsiärvus jeessân sehe Sämitige jeessân já värijeessân vuolgii fáárun uđđâ lävdikuddijd. Arâšoddâdem­lävdikoddeest lii tehálâš pargo sehe eenikielâlij já kielâpiervâlpárnái kielâ paijeentolâmist já oovdedmist. Ton lasseen mun ilodâm nuorâi stuorrâ meereest aalmugijkoskâsij algâaalmug- já EU‑aašij lävdikoddeest, vâi sii jienâ piäsá kulluđ eereeb iärrás algâaalmug- já olmooš­vuoigâdvuotâ­aašijn, Näkkäläjärvi iätá.

Näkkäläjärvi jieš väljejui tutkâmeettisii rääđi saavâjođetteijen.

– Tutkâmeettisâš rääđi, mon saavâjođetteijee mun lam, parga aldasii ohtsâšpargo sämitotkeiguin já akatemiain vijđásubbooht-uv eromâšávt talle ko mij uđâsmitškyettip munemietâmij mieđettemproosees, Näkkäläjärvi muštâl.

Arâšoddâdemlävdikodde

Arâšoddâdemlävdikodde västid eereeb iärrás sämmilii arâšoddâdem oovdedmist já valmâštâlmist sehe oovded sämipárnái vuoigâdvuođâid jieijâskielâlii já kulttuurmiäldásii arâšoddâdmân.

• Saavâjođetteijee: Leena Niittyvuopio-Jämsä (värijeessân: Aili Nuorgam)
• Värisaavâjođetteijee: Aslak Pekkala (Ainomaija Mäenpää)
• Jeessân: Inka-Maaria Näkkäläjärvi (Sanna Magga)
• Jeessân: Katja Magga (Juha Alakorva)
• Jeessân: Lávra Länsman (Mika Aikio)
• Jeessân: Taina Ketola (Nils-Heikki Magga)
• Jeessân: Irene Fofonoff (Teemu Titola)

Aalmugijkoskâsij algâaalmug- já EU‑aašij lävikodde

Aalmugijkoskâsij algâaalmug- já EU‑aašij lävdikodde oovded sämmilij vuoigâdvuođâid Euroop unionist já aalmugijkoskâsii tääsist. Lävdikode pargoid kuleh eereeb iärrás Sämitige EU- já aalmugijkoskâsij aašij strategia valmâštâllâm já olášuttem sehe sämmilij uásálâšvuođâ ovdedem EU toimâorgaanij miärádâstohâmist.

• Saavâjođetteijee: Janne Hirvasvuopio (värijeessân: Helmi Ljetoff)
• Värisaavâjođetteijee: Inka Musta (Anni-Sofia Löf)
• Jeessân: Enni Similä (Tuomas Aslak Juuso)
• Jeessân: Aslak Holmberg (Rosa-Máren Juuso)
• Jeessân: Alisa Katajamaa (Jon-Erik Näkkäläjärvi)
• Jeessân: Sárá-Márjá Keskitalo (Tiia-Káren Alakorva)
• Jeessân: Joni Gauriloff (Vesa Orassalo)

Tutkâmeettisâš rääđi

Tutkâmeettisâš rääđi oovded já kocá sämmiláid kyeskee tutkâmuš eettisij ravvui olášume já huámášumán väldim. Ton lasseen rääđi ovdâmerkkân meerrid siärvuslij munemietâmij mieđeetmist tutkâmuššáid.

• Saavâjođetteijee: Pirita Näkkäläjärvi (Värijeessân: Janne Hirvasvuopio)
• Värisaavâjođetteijee: Tauno Ljetoff (Tuomas Aslak Juuso)
• Jeessân: Heidi Eriksen (Leena Niittyvuopio-Jämsä)
• Jeessân: Inka Musta (Marjaana Aikio)
• Jeessân: Tuula-Maija Magga-Hetta (Nilla Tapiola)

Käldee:
– Sämitigge asâttij kulmâ uđđâ lävdikode nanodiđ sämmilij jiešhaldâšem kuávdáš toimâsuorgijn (samediggi.fi)

_{Kove: Pia Ruotsala-Kangasniemi / Sämitigge}