Suomi.fist tiäđuh almos palvâ­lusâin tääl meid nuorttâlâš-, anarâš- já tave­sämi­kielân

Suomi.fi-nettipalvâlusâst kávnojeh tiäđuh nuorttâlâš-, anarâš- já tavesämikielân jo suullân 180 almos palvâlusâst. Siijđoin meid muštâluvvoo palvâlusâin, maid eereeb iärrás Digi- já aalmugtiätuvuáhádâh, Eellimvyeimikuávdáš, Kela já Laapi pyereestvaijeemkuávlu fäälih sämikielân.

Ulmen lii finniđ ain eenâb ornijduumijd fáárun almostittiđ tiäđuid jieijâs palvâlusâin Suomi.fist sämikielân, vâi toh kávnojeh puátteevuođâst pyerebeht oovtâ saajeest.

– Suomi.fi lii pyeri saje sämikielâláid äššigâssáid kavnâđ almos palvâlusâid jieijâs kielân. Mij movtijdittep puoh virgeomâháid almostittiđ jieijâs jo orroo, ovtâskâs-uv sämikielâlijd palvâlusâid Suomi.fist. Tiäđust-uv mij tuáivup meid, ete virgeomâhááh ovdediččii lase palvâlusâid jieškođe-uv sämikielân, muštâl äššitobdee Nina West Digi- já aalmugtiätuvirgáduvâst.

Meid Suomi.fi-viestah kiävtust sämikielân

Nuorttâlâš-, anarâš- já tavesämikielâliih ravvuuh Suomi.fi-viestâi kiävtun láá lamaš finniimist jo ive verd. Tääl Suomi.fi-viestâid puáhtá meid kevttiđ taid sämikieláid.

– Suomi.fi-viestâi kevttim anarâš-, nuorttâlâš- já tavesämikielân luhostuvá aalgâst tuše Suomi.fi-nettipalvâlus peht. Maŋeláá lii tárguttâs almostittiđ meiddei Suomi.fi-moobiilheiviittâs sämikieláid já faallâđ máhđulâšvuođâ väldiđ vuástá Suomi.fi-viestâin puáttee šleđgâpostâalmottâsâid sämikielân, muštâl Suomi.fi-viestâi palvâlusomâsteijee Maria Juka-Lahdenperä Digi- já aalmugtiätuvirgáduvvâst.

Virgeomâháin lii meid máhđulâšvuotâ vuolgâttiđ Suomi.fi-viestâid sämikielân.

Ohtsâšpargo tuárju sämikielâlij palvâlusâi ovdedem

Sämikielâlii palvâlususâttuv pyevtittem lii ovdedum ohtsâšpargoost Digi- já aalmugtiätuvirgáduvváin, Sämitiggijn já Mij oovtâst ‑viärmáduvváin. Ton ulmen lii išediđ ulmuid kavnâđ sämikielâlijd palvâlusâid sehe pyerediđ sämikielâlij äššigâsâi máhđulâšvuođâ finniđ tiäđuid almos palvâlusâin sämikielân.

– Mij lep Sämitiggeest iloliih Digi- já aalmugtiätuvirgáduvváin algâttum ohtsâšpargoost. Ohtsâšpargo pyereed sämikielâlij palvâlusâi oinum já pyevtit koŋkreetlávt uđđâ sämikielâlijd digipalvâlusâid, iätá Sämitige nubbe värisaavâjođetteijee Tuomas Aslak Juuso.

Moh láá Suomi.fi já Suomi.fi-viestah?

Suomi.fi lii Digi- já aalmugtiätuvirgáduv paijeentoollâm palvâlus, mii iššeed já rävvee aalmugjesânijd já irâttâsâid argâpiäiválij aašij hoittáámist virgeomâháiguin já almoshiäđulij ornijdumijguin.

Anarâškielâliih palvâlusah Suomi.fist

Suomi.fi-viestah lii palvâlus, moin puáhtá vuolgâttiđ já väldiđ vuástá reeivâid virgeomâháiguin šleđgâhäämist. Cuáŋuimáánu 14. peeivi rääjist virgeomâhááh vuolgâtteh viestâid pävirpoostâ saajeest vuosâsajasávt Suomi.fi-palvâlus peht toid ulmuid, kiäh láá váldám palvâlus anon.

Lasetiäđuid Suomi.fi-viestâin puáhtá luuhâđ anarâškielân Suomi.fi-siijđoin.

Käldee: Sämitige tiäđáttâs 5.5.2026

Kove: Valtteri Valkeapolku

Kommenteh

Čääli komment

Čääli komment.
Čääli noomâd teehin.

Luuvâ meid

Uđđâsumos uđđâseh

Säminuorâi taaiđâ­tábáhtus uárne­juvvoo Heta škoov­lâst kiđđuv 2027

Jyehi-ihásâš Säminuorâi taaiđâtábáhtus uárnejuvvoo puáttee ive Heta škoovlâst Iänuduvvâst cuáŋuimáánu 29. peeivi. Iänuduv kieldâ tiävdá puáttee ive 150 ihheed, já taaiđâtábáhtus lii uási juhleive...

Tutkâmuš: Lodde­čaasij tipšo­mist lii ävkki, mut tipšo­tooimah tarbâ­šuuččii eenâb

Čäciloddenäälih láá kiäppánâm merhâšitteht Suomâst majemui luuvij iivij ääigi. Helsig ollâopâttuv já Suomâ pirâskuávdáá totkeeh selvâttii, maht loddečaasij tipšom já suojâlem láá vaiguttâm čäcilodde­naalijd...

Sämikielâi tutkâmuš oovdân­puohtui aalmugij­koskâsii sympo­siumist Bodøst

Čiččâd Saami Linguistics Symposium, SAALS7, čokkij sämikielâi totkeid já motomijd eres-uv ucceeblovokielâi äššitobdeid Tave-enâmij ulguubeln-uv Taažâ Bodøn skammâmáánu 4.–5. peeivi. Nord-universitet-ollâopâttuv čokkim ohjelm faalâi...

Puohâi tiervâs­vuotâ lii siämmáá-árvusâš – vâi lii‑uv?

Suomâ almolii tiervâsvuotâ­vuáháduv kriisâ já toos čyeccee juátkojeijee šeštimtooimah láá savâstittám ennuv majemui aaigij. Lii čielgâs, ete almoliih tiervâsvuotâ­palvâlusah iä lah tuárvi, já távjá...

Kappeer­pingviineh Zavo­dovski suol­lust láá kiäp­pán­min

Stuorrâ-Britannia aalmuglii Antarktis-tutkâmlágádâs BAS (eŋg. British Antarctic Survey) totkeeh láá tutkâm máddáápiäláá Atlant váldumeerâst leijee Zavodovski suolluu iivij 2011 já 2025. Brittiliih totkeeh muštâleh,...