Aanaar peivitipšosoojijn viättojii ávus uuvsah koskoho 22.10.2025. Toimâ uđđâ soojijn lii álgám jo vyesimáánust, ko kuohtuuh anarâškielâ kielâpiervâleh, Piervâl já Piäju, värrejii uđđâ soojijd. Tavekielâ peivikiäčču sehe suomâkielâliih juávhuh algâttii tooimâs uđđâ soojijn eskin porgemáánust. Kielâpiervâlijgijn siämmáá táálust tuáimá tavekielâlâš Urbi. Suomâkielâliih juávhuh láá siämmáá šiljoost, mut eres rakânâsâst. Kielâjuávhuh láá sierâ suomâkielâlii juávhust, vâi párnái sämikielâ pisoččij nanosin nuuvt kuhháá ko máhđulâš.
Krista Leivo Aanaar kieldâ arâšoddâdemtooimâst muštâl, ete sist lii monâmin haahâ, mon tárguttâs lii kuittâg šoddâdiđ ohtsii toimâkulttuur puoh uđđâ soojijn. Tot siskeeld ovdâmerkkân pargopyereestvaijeem já oovtnálásittem, mut tobbeen kieđâvuššojeh aaibâs táváliiih argâpeeivi ääših-uv. Pargojuávhuh teivâdeh ohtii mánuppaajeest, já toh smiettih aašijd oovtâst já meid kielâjuávhuin.
Leivo iätá, ete kielâpiervâleh láá jo muuneeld ráhtádâttâm toos, ete kielâpiervâl já eenikielâlij párnái juávhuh láá sierâ 1.1.2026 ovdâskulij, já ton tááhust párnááh tuáimih tääl viälžášjuávhuin. Perruuh láá váldám juávhui ereslágán jyehim pyereest, já tot lii išedâm meid motomij párnái kielâ. Juávhuin láá kuittâg meid ohtsiih tooimah, já siemin juávhui meeri tooimâst lii lasettum.
Uđđâ soojij vuáváámist lii pyereest valdum huámášumán kulttuur, ja kulttuur rakânâsâst uáinoo ovdâmerkkân iivnijn. Västideijee párnáitipšoo Tiina Lehmuslehti muštâl, ete puátteevuođâst sij halijdeh vala finniđ eenâb kulttuur uáinusân. Juurdân lii tiiláđ lätteeráánuid, moh lahtâseh mahtnii sämikulttuurân. Lehmuslehti juátká, ete meid kulttuurân lohtâseijee sierâid lii tárguttâs lasettiđ rähtimáin taid ovdâmerkkân párnáigijn oovtâst. Juurdân lii meid reesuursulmui kevttim párnáigijn savâstâlmist já siämmáánáál puohlágánáid kulttuurtáiđoid uápásmem-uv. Kielâpiervâláid uážžu meid faallâđ ovdâmerkkân párnái puáris mááccuhijd já kulttuur miäldásijd anopiergâsijd.
Kove: Henna Tervaniemi