Kuhes puudâ maŋa legendaarisâš rockjuávkku Leningrad Cowboys lii maccâmin läävdi oolâ puáttee čoovčâ. Talle juávkku vuálgá Tis is tö komepäk -konsertrááiđun pirrâ Suomâ. Konserteh láá vittâ: vuossâmuš konsert lii Tuurku Logomost skammâmáánu 15. peeivi, já ton maŋa juávhu puáhtá uáiniđ Kuopio-haalist (28.11.), Tampere-talost (5.12.) sehe Helsig jieŋâhaalist (6.12.). Majemuš konsert lii Vesijärvi Haalist Lahtist juovlâmáánu 11. peeivi.
Leningrad Cowboys šoodâi tobdosin 1990-lovo aalgâst, ko juávkku lávdástij oovtâst ryeššilijn Ruopsis-armeija (su. Puna-armeija) kuoroin. Juávhu njunoš Sakke Järvenpää muštâl, ete sij láá kuáđđám Ruopsis-armeija kuoro já sirdám kejâstuvâs viestâr kulij. Juávkku čuojât konsertijd uđđâ noomáin, LC Cowboys, já ton tuávááškuoron tuáimá taan keerdi Harlem Angels. Uđđâ noomâ já uđđâ tuávááškuoro tyehin lii Ruošâ volliittemsuáti Ukraina vuástá.
LC Cowboys-juávhust láá Sakke Järvenpää lasseen fáárust eereeb iärrás Pauli Hauta-Aho, Okke Komulainen, Sami Järvinen, Aino Laakso, Hanna Moisala, Esa Niiva, Anna Sainila, Ville Tuomi, Timo Tolonen, Tume Uusitalo já Varre Vartiainen.
Leningrad Cowboys -juávkku vuáđudui ive 1987. Elleekovestivrejeijee Aki Kaurismäki lii ráhtám kyehti kuhes elleekove Leningrad Cowboysist: Leningrad Cowboys Go America (1989) já Leningrad Cowboys Meet Moses (1994). Juávhu Total Balalaika Show-konsert Ruopsis-armeija kuoroin Helsig Senaatintorist kesimáánu 12. peeivi 1993 kiäsuttij ulmuid čuuvtij, ko konsert čuovvuu pääihi alne áárvu mield 50 000–70 000 olmožid. Leningrad Cowboys láá konsertistám paijeel 60 enâmist. Majemustáá juávkku lávdástij ive 2013.
Käldeeh:
– Leningrad Cowboys tekee ensi syksynä paluun – yhtye vaihtaa nimensä Venäjän hyökkäyssodan takia (yle.fi)
– Leningrad Cowboys tekee paluun – uutena taustakuorona Harlem Angels (kaaoszine.fi)
– Leningrad Cowboys tekee paluun – uutena taustakuoronaan Harlem Angels – kiertue saapuu myös Turun Logomoon 15.11.2025! (www.sttinfo.fi)
Kove: Schorle (Wikimedia Commons)