Pariisi ryevdikiäinusajattâh Gare du Nord, Ranska junájotoluv vááimus, pieijui kiddâ ubâ vástuppiäiván (7.3.), já ton keežild junájotolâh Pariisin já Pariisi pirrâsijn orostittui ollásávt. Meiddei uási Ranska A1-moottorkiäinust já uási riggeeluodâst Pariisi pirrâ piäijojii kiddâ. Suijân kiddiimáid lâi nube maailmsuáđi áigásâš pommi, mii lâi kavnum aldasijn já mii ij lam pävkittâm. Tot kavnui pargoi ohtâvuođâst tuorâstuv já vástuppeeivi koskâsii iijâ (6.–7.3.).
Pommi kavnui Saint-Denisist, mii lii lovmat kilomeetterid Pariisi kuávdáást tavas. Suullân 200 olmožid evakuistojii vistestis kilomeetterpele siste poomi kavnumsaajeest. Evakuistum ulmui vistij laasah lijjii tohokulij, kost pommi lâi kavnum. Eres ässeeh kolgii pissoođ siste poomi čurgimääigi.
Jotolâh Pariisin já Pariisi pirrâsijn normalisistui kuuloold lávvárduv 7.3. ton maŋa ko pommi lâi tohhum varâtteemmin.
Ranska jotolâhminister Tabarot muštâl NOS mield, et suullân 500 junávuárrud macâttuvvojii pirrâmpeeivi ääigi, já taat vaiguttij 600 000 ulmuu jotemáid. Ranskalâš media čaalij, et lávvárduv uárnejuvvojii kyehti paijeelmiärálii junávuáru, vâi almugijkoskâsiih mađhâšeijeeh pessii merisajasis. Almugijkoskâsiih Eurostar-junáh Amsterdamân já Lontoon vyejih oppeet äigitaavlu mield.
Minister Tabarot mield poomist lijjii 200 kiillud pavkkânâsah. ”Mij lep kale hiälbuttum ko ubâ tábáhtus lii tääl lappâd”, Tabarot iätá.
Gare du Nord -sajattuv lasseen meid Brysselist Belgia peln já Lontoost Eŋlandist lijjii kuhes mađhâšeijeerááiđuh Gare du Nord jotolâhčuolmâi keežild.
Käldeeh:
– Ook Eurostar naar Parijs rijdt weer na ontmanteling WO II-bom (nos.nl)
– Verkeer rond Parijs verstoord door vondst oorlogsbom (nos.nl)
Kove: Diliff (Wikimedia Commons)