Italia kaavpug Milanost poođij vuáimán porgottâllâmkiäldu 1.1.2025, mii kuáská masa puoh kaavpug almoláid soojijd. Kaavpugstivrâ tuhhiittij jo ive 2020 asâttâs, mon mield porgottâllâm kieldui muorâstuvâin, sierâdemkiedijn, linjâšauto-orostuvâin já valastâllâmkejâstuvâin. Tääl kiäldu kuáská meiddei kaavpug kááđoid.
Jis kiäldust huolâhánnáá kiinii porgottâl almolii saajeest Milanost, te tast sáttá finniđ 40−240 euro stuárusii sááhu. Áinoo spiekâstâh kiäldust láá tagareh sierânistum sajeh, main lii máhđulâš toollâđ ucemustáá love meetter kooskâ eres ulmuid.
Porgottâllâmkiäldu kuáská puoh ärbivuáváláid tubbáákpyevtittâssáid, mut ij šleđgâtubákkân. Kiäldu peht kaavpugstivrâ haalijd kepidiđ nuáskádâsâid. Lombardia kuávlu virgálij tiäđui mield porgottâllâm toovvât čiččâm prosentid Milano kuávlu čalmaašluáštádâsâin, muštâluvvoo asâttâsâst. Milano lii-uv ohtâ Euroop nyeskidumosijn kaavpugijn.
Ton lasseen asâttâssáin viggoo kepidiđ aalmugân háitulijd eellimtaavijd, iätá pirâsaairâs Elena Grandi. Ulmen lii suojâliđ ulmui tiervâsvuođâ, meiddei passiivlii porgottâlmist almolij soojij. Italiast jäämih suullân 9 000 olmožid porgottâllâm tiet jyehi ive.
Kiäldu tuáváást láá meid ive 2026 tälviolympialiih, moh uárnejuvvojeh Milanost já Cortina d’Ampezzost.
Käldeeh:
– Milano kieltää kadulla tupakoinnin (yle.fi)
– Mailand verschärft Rauchverbot im Freien (www.tagesschau.de)
Kove: Kristina (Pixabay)