Tavesämikielâlâš Ávvir-lostâ lii valjim ive 2024 sämmilii. Palhâšume vuoitij Anne Margaretha Oskal. Ávvir-loostâ lohhei jienâstmist Oskal uážui masa 23 prosentid puoh jienâin. Ive 2024 jienâstmân uásálistii 1 025 olmožid.
Oskal eeđâi Ávvir-loostân, et sun ij liččii oskom, et sun vuáitáččij Taan ive sämmilâš -palhâšume, tondiet ko suu eehi Mathis A. Oskal vuoitij palhâšume tijmá. Nuuvt kuittâg keevâi.
Ive 2024 Anne Margaretha Oskal vuoitij meiddei Amanda-palhâšume Pyeremus pivtâstem -kategoriast ”Eallogierdu – Tundraens voktere” -elleekove ohtâvuođâst. Amanda-palhâšume lii Taažâ tehálumos filmâpalhâšume, ige ohtâgin sämmilâš lamaš kuássin ovdil vuáittám tom Pyeremus pivtâstem -kategoriast. Ton keežild sun lâi-uv nomâttum iävtukkâssân Taan ive sämmilâš -kistoost Ávvirist.
”Muu mielâst kal lii masa stuárráb kunnee vyeittiđ taam palhâšume ko Amanda-palhâšume”, iätá Oskal. ”Ávvir-loostâ mun lam luuhâm masa ton rääjist ko oppim luuhâđ. Já tiäđust-uv ko Ávvir lohheeh láá jienâstâm, te tothân taha taam vala eromâšubbon.”
Taat lâi lovváád kerdi, ko ive sämmilâš väljejui. Ávvir juáhá palhâšume jyehi ive taggaar sämmilâžân, kote lii äŋgiruššâm sämisiärváduv pyerrin já lii tondiet tobdos Säämist. Vuossâmuš vyeittee lâi Jon Henrik Fjällgren ive 2015.
Käldeeh:
– Amanda-vuoiti «Dán jagáš sápmelaš 2024» (www.avvir.no)
– Amanda til Anne Margaretha (35) for beste kostyme (www.nrk.no)
Kove: Wolfmann (Wikimedia Commons)