Anarâškielâ seervist lii eidu almostum Timo Parvela párnáiroomaan ”Ella já Paterock”, mii lii Ella-rááiđu niäljád kirje. Tom lii jurgâlâm Henna Tervaniemi, kote lii jurgâlâm meiddei rááiđu kulmâ vuossâmuu kirje ađai ”Ella já skipáreh 1”, ”Ella já skipáreh 2” já ”Ella Laapist”. Pivnohis Ella-kirjeh láá almostum suomâkielân jo ive 1995 rääjist, já toi eromâš huumor lii ilosmittám maaŋgâahasijd lohheid pirrâ maailm.
Timo Parvela lii syemmilâš kirječällee, kote lii čáállám paijeel čyeti kirjed párnáid, nuoráid já rävisulmuid. Toh láá jurgâlum paijeel 30 kielân. Parvela kirjeh láá vuobdum Suomâst já olgoenâmijn ohtsis paijeel kuttâ miljovn pittád.
Taan kirjeest Ellaast láá suotâs usteveh, suotâs luokka já suotâs máttáátteijee. Puoh ličij-uv uáli suotâs, jis uhken iä liččii Pate luokan pääccim já suu máttáátteijee ääijim. Pate ij nomâlâssân määti kiärdumtaavlu, já suu mielâst puátteš rocktäsni ij taggaar taarbâš. Manager uážžu máttááttâllâđ tom suu peeleest. Máttáátteijee uhken pelestis lii ääijim, ko suu pennuuh Kojo já Oot olvov iijâid já huávdejeijee vist peeivijd. Luhhoost Tuukka keksee vuávám: puoh čuolmah čuávdojeh, jis Ela luokka puáhtá haahâđ máttáátteijei taampâ. Máttáátteijee puáhtá varriđ meerâ oolâ pennuidiskijn, ige sun pyevti kyeđđiđ Pate luokan ko sun lii meerâ alne pennuidiskijn. Pate pelestis puáhtá lávdástiđ vuosmuu keerdi máttáátteijee iärutiervuotâkonsertist. Sust šadda pegâlmâs, sun uážžu manager ige sun taarbâš kiärdumtaavlu. Tuukka lii fietti.
Kirje puáhtá tiiláđ seervi mediapargest (fabrizio.brecciaroli@gmail.com). Tom puáhtá meiddei uástiđ Duodji Shopist Sajosist. Ennuv luuhâmmohtâ uđđâ kirjijn!
Kove: Fabrizio Brecciaroli