Kanada algâaalmuglâš tuámmár Murray Sinclair lii jáámmám 73-ihásâžžân. Sun lâi algâaalmugij vuoigâdvuođâi já sovâdâttâmviggâmušâi piälušteijee. Sinclair puovtij oovdân Kanada asâttâhškovlâsysteem tuotâvuođâ já uđâsmittij eennâm vuoigâdvuođâvuáháduv.
Murray Sinclair algâaalmuglâš nommâ lâi Mizhana Gheezhik (anarâškielân: tot, kote sárnu kuuvijn almeest). Sun pajasšoodâi Selkirkist Kanada Manitoba provinsist. Sinclairist šoodâi Manitoba vuossâmuš algâaalmuglâš tuámmár ive 1988. Suu eellimpargon šoodâi lopâttiđ tagarijd epivuoigâdvuođâid, maid maaŋgah algâaalmugeh kuáhtájeh kolonialismpolitiik keežild. Sun stivrij Kanada tuotâvuotâ- já sovâdâttâmkomissio, mii selvâttij kuuđâ ive ääigi eennâm asâttâhškoovlâi tábáhtuumijd. Komissio kavnâttij ive 2015, ete Kanada lâi hárjuttâm ”kulttuurlii aalmugmorhe” politiik. Loppâraportist árvuštâlloo, ete paijeel 4 100 párnážid jammii tavdáid, kuáridem tiet já jiešsorme peht. Sinclair arvâlij, et tuođâlâš loho saatij leđe joba 15 000.
Sinclair paasij iäláttâhân ive 2021. Ive 2022 sun uážui Order of Canada ‑kunneemeerhâ algâaalmugij vuoigâdvuođâi já rijjâvuođâi piäluštmist. Order of Canada lii Kanada alemus kunneemerkkâ, mii mieđettuvvoo Kanada aalmugjesânân, kote lii merhâšitteht ovdedâm kunneemeerhâ läättinkielâlii moto Desiderantes meliorem patriam (ađai ”pyereeb eejieennâm haalijdmáin”).
Käldee:
– Indigenous Canadian judge who reshaped nation’s legal system dies aged 73 (www.theguardian.com)
Kove: Archkris (Wikimedia Commons)