Meccihaldâttâs Luándupalvâlusah láá tärhistâm ohtsis 33 hiäŋgušalde torvolâšvuođâ. Uđđâ kiävttukiälduh iä puáttám, mut kyehti hiäŋgušalde pisoh ain kiävttukiäldust. Nubbe tain lii Repovesi aalmuglâšmeecist já nubbe Hossa aalmuglâšmeecist.
Repovesi aalmuglâšmeecist kiävttukiäldust lii Lapinsalmi hiäŋgušalde já Hossa aalmuglâšmeecist Julma-Ölkky hiäŋgušalde. Repovesi šalde lii lamaš kiddâ uđđâivemáánu rääjist, tastko Meccihaldâttâs mield korrâ pieggâ sáttá vahâgittiđ tom. Julma-Ölkky hiäŋgušalde Hossa aalmuglâšmeecist vist poođij kiävttukiäldun vyesimáánu loopâst. Meccihaldâttâs arvâl, et täälvi muottuuh láá vahâgittâm šalde, mon ij lah tääl torvolâš kevttiđ.
Meccihaldâttâs Luándupalvâlusah meridii tärhistiđ eres-uv hiäŋgušooldijd talle ko sij huámmášii, et Julma-Ölkky šalde lii vahâgittum. Tärhistem ohtâvuođâst kuálmád-uv šalde valdui meddâl kiävtust. Čuđejuuvâ hiäŋgušalde Pänituoddâr meccikuávlust lâi kiävttukiäldust kesimáánu aalgâst. Tot kuittâg lekkui oppeet kesimáánu majemuu ohhoost.
Meccihaldâttâs almoot talle ko hiäŋgušaldeh láá oppeet kiävtust. Sehe Repovesi já Hossa aalmuglâšmeecist puáhtá jotteeđ maaŋgâpiälásávt, veikkâ taah kyehti šalde láá-uv kiddâ. Hossa Julma-Ölkkyst piäsá ain väzziđ juuvâ kuábbáá-uv peln, já Repovesist Lapinsalmi rasta jotá käärbis syeinimáánust jyehi peeivi tijme 10 já 18 kooskâst.
Käldeeh:
– Repoveden ja Hossan riippusillat pysyvät käyttökiellossa (yle.fi)
– Kansallispuistojen ja retkeilykohteiden riippusiltojen tarkastukset päätökseen – suljettuina pysyvät Lapinsalmen silta Repoveden ja Julma-Ölkyn silta Hossan kansallispuistossa (www.metsa.fi)
Kove: Jasmina Schreck