Jyelgipáálu almai euroopmiäštárkištoi pelifinaleh spiällojii syeinimáánu 9. já 10. peeivi tijme 22:00. Toh čáittojii Yle TV 2 -kanavast já Yle Areenast.
Espanja-Ranska, 9.7.2024
Espanja já Ranska láá kuohtuuh stuorrâ jyelgipálluenâmeh. Espanja lii vuáittám almai EM-kištoid kulmii já almai maailmmiäštárvuođâ ohtii. Espanja almai jyelgipállujuávkku ij lah lamaš árvukištoi finalist 12 ihán. Majemuš fiinaal tast lâi 2012 EM-kištoin, mon tot vuoitij. Ranska lii vuáittám sehe euroopmiäštárvuođâ já maailmmiäštárvuođâ kuohtii.
Espanja já Ranska spellâmstiijlah lijjii masa nubijdis vyestikeejih. Espanja speelâi makkuutteijee, aktiivlii já volliitteijee speelâ, ko vist Ranska pálustâlâi passiivlubbooht já turvâstij eenâb piäluštmân.
Paijeel 62 000 keččed čokánii Allianz Arenan Münchenist syeinimáánu 9. peeivi tijme 22:00, ko tuámmár piejâi speelâ joton. Ranska algâttij kievrâht, já tot čielgâsávt haldâšij speelâ aalgâst. Ranskalâš volliitteijee Randal Kolo Muani čievčâstij moolâ 9. minuttist, mii visásmitij tom, et Ranska haldâšij speelâ. Täsnispellee Kylian Mbappé čievčâstij páálu Kolo Muanin, kii nurvoi páálu Espanja moolâvaavtâ lappâd. Ranska luhostume huáputtij Espanja volliitteijeid täsidemmoolân já adelij Ranskan máhđulâšvuođâ passiivistuđ piäluštmân.
21. minuttist 16-ihásâš Lamine Yamal päjistij páálu Ranska moolâ čižetpele pajenuuskán. Pállu huurgij muččâdávt paijeel Ranska moolâvaavtâ Mike Maignan já teeivâi moolâstuálpun, mast tot koolpâi moolân. Ive 2007 šoddâm Yamalist šoodâi almai jyelgipáálu euroopmiäštárkištoin nuorâmus moolâ čievčâstâm spellee. FC Barcelona spellee Yamal tiävdá 17 ihheed syeinimáánu 13. peeivi, ađai peeivi ovdil euroopmiäštárkištoi fiinaal.
Yamal moolâ tooimâi motivaation já energiakälden espanjaláid, ijge moonnâm kuhháá ovdilgo Espanja čooskij uđđâsist. Pállu cancoi Ranska moolâ oovdâst espanjalâš Dani Olmon, kii konstušij páálu moolân. Spellâ lâi 2–1 Espanjan, já piäluštmân lijkkojeijee Ranska kaartâi volliittiđ. Ranska irâttij tassiđ speelâ puoh konstâiguin, mut mihheen ij moonnâm Espanja piäluštâs čoođâ. Spellâ nuuvâi Espanja vuáitun molâiguin 2–1.
Eŋland-Holland, 10.7.2024
Eŋland almai jyelgipállujuávhu miänástuumeest lii uánihis historjá. Eŋland vuoitij maailmmiäštárvuođâ ive 1966 Viestâr-Saksa vuástá. Tot lii Eŋland áinoo kištovuáittu kuássin. Eŋland lii kuohtii peessâm euroopmiäštárkištoi finalân, tááláin kištoin já ovdebáin kištoin ađai ive 2021. Eŋland nisonij jyelgipállujuávkku, ađai Lionesses, vuoitij maailmmiäštárvuođâ ive 2022.
Holland almai jyelgipállujuávkku vuoitij euroopmiäštárvuođâ ive 1988. Holland lii meid peessâm maailmmiäštárkištoi finalân kulmii, mut Holland táppái puoh kulmâ fiinaal. Holland nisonij jyelgipállujuávkku vuoitij euroopmiäštárvuođâ ive 2017.
Holland-Eŋland spellâ aalgij syeinimáánu 10. peeivi tijme 22:00 Dortmundist Saksaast. Holland jyelgipállulito mield Holland fanimaarsân Dortmundist uásálistii 110 000 Holland kyeditteijed. Speelâ pessii keččâđ stadionân ohtsis suullân 60 000 keččed.
Spellâ aalgij rávhálávt. Kuábbááh-uv juávhuh mittedii nubijdis já irâttii kavnâđ vuástálistee juávhust monnii hiäjuvuođâ. Čiččâm minuttid kiergânii kuullâđ, ovdilgo hollandlâš Xavi Simons paajij moolâ. Simons čievčâstij páálu tárkká já vuáimálávt Eŋland moolân. Taat ij kuittâg lamaš uđđâ äšši Eŋlandân. Eŋland lii masa jo táppám puoh kočâttemspelâidis, mutâ juávkku lii kuittâg loppâloopâst vuáittám taid puoh.
18. minuttist tuámmár meridij ráŋgáštâsčievčâstem Eŋlandân. Tuámmár miärádâs lii kritisistum mediast, meid englandlii jyelgipállulegendai juávhust. ”Ij eisigin ráŋgáštâsčievčâstem”, čaalij eŋlandlâš jyelgipállulegenda Jamie Carragher. Meid ovdâmerkkân 85 spellâd Eŋland pääiđist spellâm Gary Neville kritisistij miärádâs. Eŋlandlâš volliitteijee Harry Kane ij perustâm kritikist, pic čievčâstij ráŋgáštâsčievčâstem moolân. Spellâ lâi taan muddoost 1–1.
Eŋlandist lijjii maaŋgah máhđulâšvuođah moolân, mut Holland piäluštij pyereest. 81. minuttist Eŋland uáivivälmejeijee Gareth Southgate molsoi Ollie Watkins kiedi oolâ. Love minuttid maŋeláá Watkins paajij vuáittumoolâ Eŋlandân.
Finalist nubijdis vuástá spellih makkuht volliitteijee Espanja já täsnispellein tievâsmittum Eŋland. Fiinaal spiälloo syeinimáánu 14. peeivi tijme 22:00 Berlinist. Fiinaal čáittoo Yle TV 2 -kanavast já Yle Areenast.
Käldeeh:
– Englanti eteni EM-loppuotteluun lisäajan maalilla (www.hs.fi)
– Jopa Englannin entiset tähtipelaajat ihmettelivät EM-välierän tuomariratkaisua: ”Häpeällistä” (www.hs.fi)
– Ranskan kiri jäi piippuun – Espanja 16-vuotiaan sensaation johdolla finaaliin (www.hs.fi)
– Spain vs France timeline (www.uefa.com)
– Netherlands vs England timeline (www.uefa.com)
Kove: Tobias Alt, Tobi 87 (Wikimedia Commons)