Pesipáálu täsnispellei Nuorttâ- já Uárji-juávhuh spellii kesimáánu 29. peeivi nieidâi já nisonij speelâin já 30. peeivi kaandâi já almai speelâin. Kištoh uárnejuvvojii Jyväskyläst. Puáttee ive pesipállukištoh spiällojeh Kouvolast.
Nieidah kuáhtájii 47. keerdi Nuorttâ–Uárji-kištoin. Uárji lâi čielgâsávt pyereeb: tot kuođij Nuortâ kaččâmijttáá já vuoitij 0–2 (0–3, 0–3). Kiedi pyeremussân spellen väljejui Uárji-juávhu 18-ihásâš Lyydia Eskola, kote oovdâst Pöytyän Urheilijat -juávhu nisonij Superpesis-liigast já Laitilan Jyske -juávhu nieidâi Superpesis-liigast. Sun speelâi vuosmuu uásist lukkárin já čooskij meiddei oovtâ kaččâm. Uárji-juávhust vuossâmuu já nube palhâšume finnijn Charlotta Höglund (Lapuan Virkiä) já Odessa Tiitto (Jokilaakson Pesäkuula). Nuorttâ-juávhust vist palhâšuin Veera Varonen (Joensuun Maila) já Mira Heikkilä (Haminan Palloilijat).
Nisonij 62. kištoost šoodâi uáli jo čoovgâs 3 293 keččee oovdâst. Nuorttâ uážui pyere aalgâ já luhostui vyeittiđ vuosmuu uási 5–4. Nube uásist Nuorttâ lâi vyeittimin 2–0 ko lâi tuše ohtâ vuárupaarâ spelâhánnáá. Ko Nuorttâ finnij vala kyehti puálu, te kišto loopân tarbâšui ohtâ puálu. Uárji 12 vuáitu ráiđu oroi lemin viijmâg potkânmin. Talle tábáhtuuškuođij veikkâ mii. Kaisa Peräaho (Lapuan Virkiä) já Silja Syrjälä (Seinäjoen Maila-Jussit) kuohtuuh čoskijn kunneekaččâm já puovttijn táválii-uv kaččâm. Uárji finnij vala kyehti kaččâm já vuoitij nube uási 2–6. Pááikánčaskemkištoost Uárji finnij tuše oovtâ kaččâm. Nuorttâ-juávhust luhostuin Anna Ala-Kauhaluoma (Manse PP) já Tinja Töyrylä (Jyväskylän Kirittäret), já nuuvt Nuorttâ juhloi vuosmuu vuáitus ive 2010 maŋa. Lase jiäráskitteevuođâ kiišton faalâi vala tot, et majemuš kaččâm tärhistui videoin.
Kiedi pyeremussân spellen väljejui Nuorttâ-juávhu Ala-Kauhaluoma, kote čooskij ohtsis nelji kaččâm. Suu mielâst sii juávkku speelâi sisvuárust tuođâi pyereest já olgovuárust-uv pyereest, eereeb kyevti vuárust. Nuorttâ-juávhust vuosmužžân palhâšui kapteen Venla Karttunen (Jyväskylän Kirittäret) já nubben Saaga-Angelia Raudasoja (Manse PP). Uárji-juávhust vist palhâšuin Syrjälä já Aino-Kaisa Mantere (Seinäjoen Maila-Jussit).
Kaandâi 66. Nuorttâ–Uárji-kišto nuuvâi Nuortâ vuáitun. Kuohtuuh uásih lijjii täsiveh. Nuorttâ vuoitij vuosmuu uási 4–3. Nube uásist kuábáškin juávkku ij finnim oovtâgin kaččâm, já nuuvt Nuorttâ vuoitij ubâ kišto. Kiedi pyeremus lâi Nuorttâ-juávhu Niklas Moilanen (Jyväskylän Kiri), kote lâi kuávdáš spellee vuosmuu uásist. Nuorttâ-juávhust palhâšuin Akseli Pitkänen (Kouvolan Pallonlyöjät) já Roope Seppänen (Imatran Pallo-Veikot). Uárji-juávhust vist palhâšuin Vili Still (Ylivieskan Kuula) já Olavi Perälä (Alajärven Ankkurit).
Nuorttâ–Uárji-kištoi kliimaks lâi almai 89. kišto, mon čuovvuu 3 683 keččed. Nuorttâ lâi vuáittám kulmâ ovdebáá kišto. Tot algâttij tääl-uv vuáittoin, tastko Uárji lukkár endurân moonnâm leggistem keežild juávkku monâttij kyehti kaččâm, já vuosmuš uási nuuvâi 2–1. Te Uárjigis vuoitij 3–5. Pááikánčaskemkištoost Uárji latkišis olgospellâ kuođij Nuortâ kaččâmijttáá. Ko Uárji-juávhu Jukka-Pekka Vainionpää (Vimpelin Veto) čooskij já Mikko Vihriälä (Vimpelin Veto) kaačâi oovtâ kaččâm, te Uárji vuoitij kišto. Kiedi pyeremussân spellen väljejui Uárji-juávhu Perttu Ruuska (Manse PP), kote čooskij kyehti kaččâm. Ruuska lâi kiedi pyeremus meiddei ive 2019, ko Uárji vuoitij kišto ovdebáá keerdi. Uárji pyeremussân palhâšui lukkár Topi Still já nubben Valentin Ikonen. Nuorttâ-juávhust vist palhâšuin Aku Kettunen já Konsta Kettunen.
– Itä katkaisi Lännen 12 voiton sarjan pesäpallon naisten arvo-ottelussa (yle.fi)
– Jukka-Pekka Vainionpään lyönti ratkaisi, Länsi vei arvo-ottelun ensi kertaa viiteen vuoteen (yle.fi)
– Länsi nollasi Idän tyttöjen arvo-ottelussa (www.superpesis.fi)
– Idän naiset katkaisivat Lännen ennätyksellisen voittoputken (www.superpesis.fi)
– Itä nappasi voiton pokien arvo-ottelusta (www.superpesis.fi)
– Länsi käänsi miesten Itä-Lännen niminsä (www.superpesis.fi)
Kove: Wigiguru (Wikimedia Commons)