Veikkâ juovláid lii vala mottoom verd äigi, te servikodeh ráhtádâtteh jo juhlepajan. Suomâ evaŋgellâš-luuteerlâš kirkko tieđeet, ete Muččâdumos juovlâlavluuh -tábáhtusah uárnejuvvojeh adventääigi kuulmâ sämikielân Sämieennâm lasseen meiddei viiđâ kaavpugist Säämi ulguubeln.
Muččâdumos juovlâlavluuh (suomâkielân Kauneimmat joululaulut) lii Suomâ stuárráámus muusiktábáhtus, já jyehi ive suullân miljovn olmožid uásálisteh tábáhtussáid pirrâ Suomâ. Ton lasseen, ete tábáhtusâin piäsá lávluđ juovlâlavluid, tain puáhtá meiddei skeŋkkiđ ruuđâ maailm párnái pyerrin.
Uđđâ Muččâdumos juovlâlavluuh -vihko almostui sämikielân ive 2022. Vihkoost láá lavluuh anarâškielân, nuorttâlâškielân já tavesämikielân. Vihkoost lii meiddei fáárust ohtâ sämmilij rähtim laavlâ, tavesämikielâlâš Čuovgga urbi. Lavluu lii nuottim Anna Näkkäläjärvi-Länsman, já saanijd lii čáállám Inger-Mari Aikio.
Sämikuávlu ulguubeln juovlâlavluid puáhtá lávluđ sämikielân čuávuváin tilálâšvuođâin:
30.11. Tuurku tuámukirhoost tme 19
2.12. Helsig tuámukirhoost tme 15
3.12. Tamperest Pyynikki pappâlist tme 14
3.12. Oulust Karjasilta kirhoost tme 15
4.12. Ruávinjaargâ kirhoost tme 18
Kirho tiäđáttâs mield tábáhtusâin lává Helsigist, Tamperest já Ruávinjaargâst fáárust pappâ Mari Valjakka já SámiSoster rs. pargee Inga Koivisto. Ruávinjaargâ tilálâšvuođâst lii fáárust meiddei Leena Fofonoff Sämmilii psykososiaallâš torjuu ohtâduvvâst Uuvjâst. Mari Valjakka parga Sämmiliih kirhoost -haavâ proojeektjođetteijen, já sun joođeet taid tilálâšvuođâid.
Tábáhtusâin Suomâ Vuolgâttâsservi (suomâkielân Suomen Lähetysseura) čuákkee ruuđâ, nuuvt ete párnááh pirrâ maailm pyehtih finniđ iše. Toiguin ruđâiguin išeduvvojeh párnááh, kiäh láá puoh hiäjumuu uásist. Párnááh finnejeh iše peerusthánnáá sii oskolduvâst, kielâst teikkâ etnisâš tuáváást. Suomâ Vuolgâttâsservi viggá ovdediđ ovdâmerkkân tom, ete kievhivuotâ kiäppán maailmist, ulmuuh pyehtih eelliđ olmoošárvusii eellim já ulmui vuoigâdvuođah olášuveh. Pargostis Suomâ Vuolgâttâsservi haalijd meiddei ovdediđ tagarij párnái škovliittâs já vuoigâdvuođâid, kiäin lii miinii vááduid. Suomâ Vuolgâttâsservi parga oovtâst páihálij kirhoiguin já ornijduvâiguin ovdâmerkkân ton oovdân, ete eenih uážžuh tiervâsvuotâpalvâlusâid. Párnái tááhust kuávdáást lii, et sij uážžuh purrâmuš já putes čääsi. Tehelâš lii meid tot, ete sij pyehtih šoddâđ torvolii pirrâsist já ete sij finnejeh škovliittâs.
Käldee:
– Saamenkielisiä Kauneimpia joululauluja lauletaan Helsingissä, Oulussa, Turussa, Tampereella ja Rovaniemellä (www.epressi.com)
Kove: Frauke Riether (Pixabay)