Judo Euroop miäštárvuođâin lii kištottâllum moonnâm ohhoost Ranska Montpellierist. Suomâ ovdâsteijen tatamist njunošnommân lii lamaš lusis kategoria (paijeel 100-kilusiih) judoka Martti Puumalainen.
26-ihásâš Puumalainen vuoitij pasepeeivi semifinalist Vuáládâhenâmij Jelle Snippe já peesâi toin naalijn finalân, mii lâi siämmáá eehid. Finalist suu vuástálisten lâi georgialâš Guram Tushisvili, kote lii hárjánâm judoka árvukištoi miitaalkištottâlmijn. Finalist Puumalainen vuoitij georgialii ipponáin, já sun peesâi juhlođ EM-kole.
Kišto lâi aalgâ rääjist tärhis spellâ. Tushisvili finnij vuosmuu čođâldittem ääigis 1.40. Georgialâš fattij kiddâ kieŋâlist Puumalaisii puáhhást já peesâi leggistiđ wazar. Ton maŋa Tushisvili piäluštij tárkká.
Neelji miinut spellâääigist lâi vala mottoom seekunt, ko syemmilâš peesâi niske oolâ. Sun luhostui finniđ jyelgileggistmáin georgialii lättei já masaba káávvud. Tile lâi táásá 1–1, já tondiet oovdâst lâi jotkâäigi.
Jotkâääigi spellâ ovdán tassaažân ko juábáš kuábáš finnee jo-uv čuággáid teikâ kyehti váruttâs. Jotkâäigi lâi kuullâm miinut já 14 sekuntid, ko Puumalainen volliittij. Sun uhkedistij ucánjáhháá, moos Tushisvili reagistij. Ko georgialâš lappuustij váhá, te Puumalainen keevtij ävkkin vuástálistes lihâstuv já luhostui stuorrâ jyelgileggistmist. Pevdikirjeest taat lihâstâh merkkejui ipponin, já nuuvt Puumalainen vuoitij EM-kole.
Speelâ ääigi syemmiliih keččeeh kyedittii Puumalaisii korrâsávt: pääihi oolâ lijjii mađhâšâm ennuv syemmiliih judo usteveh. Meiddei palhâšumij jyehimist lâi syemmilâš ovdâsteijee, tastko mitalijd keigiimin lâi Suomâ judolito saavâjođetteijee Esa Niemi.
Puumalaisii välmejeijen tuáimá slovenialâš Rok Drakšič, kote jieš vuoitij Euroop miäštárvuođâ love ihheed tassaaš Budapestist 73-kilusijn.
Puumalaisii EM-miitaal lii vuosmuš syemmilii vyeittim judomiitaal 30 ihán. Ovdil Puumalaisii kajaanilâš Jorma Korhonen vuoitij EM-proonsi 71 kiilu kategoriast ive 1993. Ovdil tom Korhonen vuoitij ive 1989 Euroop miäštárvuođâ, já ive maŋeláá sun lâi silbâmitalist.
Käldee:
– Martti Puumalainen voitti EM-kultaa! (www.is.fi)
Kove: Reijo Telaranta (Pixabay)