Suomâ lii peessâm Davis Cup niäljádâsfinaláid vuossâmuu tove historjást

Čohčâmáánu 12.–17. peeivi spellui Davis Cup 1. kiärdu. Fáárust lijjii 16 juávkkud, moh lijjii juohhum neelji uásádâhân. Suomâ lâi uásáduvâst D, mast Suomâ lasseen lijjii Kroatia, Ovtâstum staatah já Vuáládâhenâmeh. Suomâ uásáduv puoh speelah spiällojii Splitist, Kroatiast.

Suomâ speelâi vuossâmuu speelâs čohčâmáánu 12. peeivi Vuáládâhenâmij vuástá. Talle Otto Virtanen vuoitij Botic van de Zandschulp 7–6, 6–4, já Tallon Griekspoor vuoitij Emil Ruusuvuori 7–6, 6–3. Tastmaŋa Wesley Koolhof já Matwé Middelkoop vuoittijn niäljásspeelâ, já tondiet Suomâ táppái ohtsis 2–1.

Suomâ čuávuvâš vuástálistee lâi Kroatia. Suomâ vuoitij kuohtuid kuáhtásspeelâid. Vistig Otto Virtanen vuoitij Dino Prižmić 6–4, 3–6, 6–3, já talle Emil Ruusuvuori vuoitij Borna Gojo 7–6, 6–4. Tastmaŋa Kroatia vuoitij niäljásspeelâ. Tot ij liijkágin muttám loppâpuáttus, já Suomâ vuoitij ohtsis 2–1.

Čohčâmáánu 16. peivi 2023 lâi historjálâš peivi Suomâ tennisân. Talle Suomâ vuoitij Ovtâstum staatâid, já nuuvt tot peesâi Davis Cup niäljádâsfinaláid vuossâmuu tove historjást. Suomâ vuáittu lâi uáli jo stuorrâ olâttâs. Ovtâstum staatâi tennisjuávkku lâi ohtâ kievrâmuin vyeitteeiävtukkâsâin, tastko tot lii jo vuáittám Davis Cup ohtsis 32 kerdid, já ton lasseen tot lii táppám finalist 29 kerdid. Suomâ vuoitij puoh speelâid Ovtâstum staatâi vuástá. Otto Virtanen vuoitij Mackenzie McDonald 7–6, 1–6, 7–6, Emil Ruusuvuori vuoitij Tommy Paul 7–6, 6–4, já majemuu speelâst Harri Heliövaara já Patrick Kaukovalta vuoittijn Austin Krajicek já Rajeev Ram 6–7, 7–6, [10–8].

Niäljádâsfinaleh, semifinaleh já fiinaal spiällojeh Malagast, Espanjast skammâmáánu 21.–26. peeivi 2023. Nubenáál ko 1. kiärdust, mast jyehi juávkku speelâi kuulmâ eres juávhu vuástá, toh láá nuuvt kočodum kočâttemspeelah. Tot meerhâš tom, et jyehi juávkku spiällá tuše oovtâ juávhu vuástá: vyeittee piäsá ovdâskulij, já táppájeijee kačča meddâl Davis Cupist. Niäljádâsfinaláid láá peessâm čuávuvááh juávhuh: Kanada, Ovtâstum kunâgâskodde, Tšekki já Vuáládâhenâmeh uásáduvâi vyeitten sehe Italia, Australia, Serbia já Suomâ uásáduvâi nubben. Suomâ áigu spellâđ jo-uv Tšeeki teikâ Kanada vuástá.

Käldee:

– Davis Cup: Draws & Results (www.daviscup.com)

Kove: formultiples (Pixabay)

Kommenteh

Čääli komment

Kirjoita kommenttisi!
Kirjoita nimesi tähän

Luuvâ meid

Uđđâsumos uđđâseh

Hundârušmeh purrâmušveerhij pyehtimist Suomân

Uuđâs, et Lidl ij innig pyevti heđâlmijd já ruonnâsijd kirdemrahtin lii sehe pyeri já hyenes äšši. Lii pyeri, ete purrâmušveerhij CO2-luástuh kiäppáneh, mutâ hyenes...

Uđđâ kirječällee anarâškielân

Saijoos šiljoost skirviittâleh ulmuuh kirkis piäiváduvvâst. Lii koskokko, cuáŋuimáánu 3. peivi, já Aanaar keessilis kirjerááju siste kullojeh ilolâš povvâstem, uccâumogáá iloliih jienah já olmoošjuávhu...

Áimutiettuu lágádâs: Suomâ puttásumos áimu kávnoo-uv Pallasist

Sveiccilâš IQAir-irâttâs raapoort tieđettij moonnâm ohhoost, et maailm puttásumos áimu kavnuuččij Suáđigilist, Ucjuuvâst já Kuáccámist. Tast muštâlii eres lasseen Helsingin Sanomat sehe meid Anarâš...

Kanada áigu faallâđ nuuvtá estim nisonáid

Kanada haldâttâs áigu faallâđ nuuvtá äpittesvuođâ estim eennâm puoh suhâjuátkimahasáid nisonáid. Ääšist muštâlij Kanada išeuáiviminister Chrystia Freeland. Estimpillerij hadde lii Kanadast suullân 205 eurod ivveest....

Aleksi Virolainen lii vuosmuš syemmilâš, kote lii vuáittám maailm tehálumos Counter-Strike 2 -turnam

Syemmilâš Aleksi "Aleksib" Virolaisii juávkku Natus Vincere vuoitij Counter-Strike 2 -speelâ Major-turnaamist Kööbenhamânist maŋŋeed pasepeeivi ehidist njuhčâmáánu 31. peeivi. Major lii speelâ tehálumos já...