Aalmuglâšáánnum ellei vuoigâdvuođâi lasseetmist Suomâ vuáđulaahân lii uážžum paijeel 50 000 vuáláčálusid já tienuuvt ovdán ovdâskoodán. Ánumist iävtuttuvvoo, et vuáđulaahân čalluuččij uđđâ loho, mast kieđâvuššuuččii eres lasseen ellei suojâlem, luánduellei já ulmui tipšo tarbâšeijee ellei vuoigâdvuođah sehe taggaar nälistittem kieldim, mii toovvât elleid teikkâ tai maajeeldpuátteid fyysisijd tâi psyykkisijd hááituid.
Iävtuttâs kuávdáš ulmen lii, et elleeh tubdâstuvvojeh tobdee iälánin já vuáđuvuoigâdvuođâi haldâšeijen. Aalmuglâšáánnum láá toohâm Suomâ elleevuoigâdvuotâjuristeh (Suomen eläinoikeusjuristit ry).
Suomâ tááláá vuáđulaavâst elleeh iä lah mainâšum ollágin. Ovdâmerkkân Saksaast, Sveeicist já Brasiliast toh láá mainâšum tai enâmij vuáđulaavâst, mut návt viijđes kirjim ko taan aalmuglâšánumist iävtuttuvvoo ij lah oinum vala kuássin, iätá Suomâ elleevuoigâdvuotâjuristij värisaavâjođetteijee Visa Kurki Yle Radio Suomen Päivä ‑ohjelmist.
Aalmuglâšánumeh ovdáneh ovdâskoodán, jis toh uážžuh ucemustáá 50 000 vuáláčálusid. Äigi nuurrâđ vuáláčálusijd lii kuttâ mánuppaje. Áánnum ellei vuoigâdvuođâi čälimist vuáđulaahân puáhtá vuáláčäälliđ porgemáánu 27. peeivi räi tääbbin.
Käldeeh:
– Kansalaisaloite eläinten oikeuksien kirjaamisesta perustuslakiin etenee eduskuntaan (yle.fi)
– Mitä ovat eläinoikeudet? (arenan.yle.fi)
Kove: MM (Pixabay)