Tornien taisto ‑nommâsii loddeboŋŋamtábáhtume lasseen loddeservi BirdLife Suomâ uárnee siämmáá oholoopâ meid váhá keppisub tábáhtume, mađe várás ij taarbâš vyelgiđ kuussân, pic toos puáhtá uásálistiđ pääihist. Boŋŋaa peeivi šiljoost ‑tábáhtume (su. Bongaa päivä pihalla) keksejui kiđđuv 2020, ko koronapandemia ääigi ij lamaš avžuuttettee čokkâniđ maaŋgâi eres ulmuiguin loddetornáid, já Tornien taisto -tábáhtume macâttui. Ton saajeest poođij uđđâ tábáhtume, mii movtijdit viettiđ hitruus peeivi jieijâs šiljoost, navdâšiđ luándust já boŋŋađ luudijd.
Boŋŋaa peeivi šiljoost ‑tábáhtume ulmen lii keččâđ, mon ennuv jieškote-uvlágánijd loddešlaajâid puáhtá uáiniđ jieijâs šiljoost oovtâ kiđđâpeeivi ääigi. Kuávlu, kost uážžu boŋŋađ luudijd, lii čyeđe meetter suonjârist jieijâs pääihi teikkâ tuuváá pirrâ. Meid luudijd, moh uáinojeh tâi kullojeh kukkeláá, uážžu luuhâđ fáárun. Uásálistiđ puáhtá jo-uv lávurduv teikkâ pasepeeivi, já ubâ pirrâmpeeivi uážžu kevttiđ luudij boŋŋaamân. Boŋŋađ puáhtá ohtuu teikkâ skipárijguin já nuuvt kuhháá ko olssis suápá. Loddešlaajah almottuvvojeh BirdLife siijđoin kávnojeijee sierâ luámáttuvváin. Taan ive tábáhtume uárnejui vyesimáánu 6. já 7. peeivi.
Nuuvtpa mun-uv movtáskim boŋŋađ oppeet luudijd já viettiđ ääigi jieččân šiljoost moonnâm pasepeeivi. Mun aasâm Oulust kerditáálust, mon šiljoost láá suávih, peesih, motomeh miestuuh já uccâ kirsikmuorâš. Iiđeedpitá maŋa mun tolvum ruuskijd já elâččim siämmást keččâmin,oinuuččii-uv lodeh. Olgon kávnojii olmoošnaabureh, jiemge tien tove boŋŋam vala maiden. Lodeh kuittâg kullojii, veikkâ toh iä šiljoost návt huápust oinum.
Ehidispeeivi mun oinim, et tie te päiski kirdá laasâ lappâd. Vuossâmuš loddešlaajâ liiston! Mun kuulâm, et šiljoost ränisrástágááh skeikkih korrâ jienáin. Toh láá tuođâi ennuv eidu tääl. Kiijkárijguin uáiná, et pessimhomáh láá joođoost oovtâ peesist. Kyehti ränisrástágáá lává ucâmin purrâmuš sino alne, nubbe jo tuápu mááđu.
Mut iä puoh lodeh, moh sulâstiteh ränisrástágáá, tuođâi lah ränisrástágááh. Ko oppeet kiijkárijguin kiäččá, te ton oovtâ rástágáást, mii eidu siäivu kiännii luptâstuv kaitháá oolâ, lii ruopsis ertpeeli. Tot lii-uv jiešalnees veigilodde. Táálui paajaabeln kiirdâš forgâ jo vuorâččâs, niäljád loddešlaajâ. Mun uáinám lase ränisrástágáid, moh oceh tiivrijd já kuldâleh, mii toi pirrâsist tábáhtuvá. Ivnijdis peeleest taid lii uáli vaigâd ubâ huámášiđgin talle ko toh iä liihâd iäge ráávu, tääl ko piirâs lii vala ruškâd já räänis. Ađai pyeri syeji-ivne! Paifakkist skeikkee miinii eres luudijd. Lädikuávská kiirdâš lappâd já siäivu pecikierrui.
Veikkâ tábáhtume nommâ lii ”Boŋŋaa peeivi šiljoost”, lii loválâš lihâdiđ čyeđe meetter suonjârist jieijâs pääihi pirrâ. Nuuvtpa luoddâpiällást kulloo vala piäippáin, já pyeidicissááš-uv civkká. Majemužžân šiljoost uáinoo pešnirihhááš, mii ilolávt njuškood saajeest nuubán já kirdel talle oppeet meddâl.
Peivi lii jo moonnâm, mut kenski ehidist liččii vala eehidlávlooh? Käävci ääigi čuovjiscissáášpaarâ lii kiirdâšmin tuohu teehi, já nubbe lii jo maccâmin loddevuovdân. Suoi láin libžom taan loddevuovdâ pirrâ jo njuhčâmáánu rääjist, mut tääl oro, et ääših láá monâmin tuođâlâžžân. Peic veigilodde, mon lavlum kulloo eromâšávt ehidist, meid ruopsisryeivil lii tääl jienâst. Pasepeeivi 7.5.2023 mun oinim tâi kuullim ohtsis love loddešlaaijâd mii šiljoost já ton pirrâsist: čuovjiscissááš, lädikuávská, pešnirihhááš, piäippáin, pyeidicissááš, päiski, ruopsisryeivil, ränisrástágâš, veigilodde já vuorâččâs.
Koveh: Atte Oksanen