Ovtâstum staatâi stuorrâvuolgâttâsulmuu mield Kapkaavpugist viärjuh láá pieijum taampân, mon oomâst ryeššilâs finnodâh.
Maadâ-Afrik rand kurssâ cuovkkij oppeet negatiivlii ulâttâs Ovtâstum staatâi dollar vuástá vástuppeeivi tastmaŋa ko Ovtâstum staatah sujâttii president Cyril Ramaphosa haldâttâs tast, et tot lii syele toimâttâm viärjuid Ruošân. Viärjui toimâttem puáhtá hiäjusmittiđ Maadâ-Afrik kävppikoskâvuođâid Ovtâstum statâiguin, moh láá Maadâ-Afrik nubben tehálumos kävppikyeimi.
Iđedist ohtâ dollar lâi 19,35 randid, mii lii uđđâ ulâttâs. Suijân toos lii tot, et Ovtâstum staatâi stuorrâvuolgâttâsolmooš Reuben Brigety naggij tuorâstuv, et moonnâm ive Maadâ-Afrik adelij viärjuid Lady R ‑nommâsii taampân, mon oomâst ryeššilâs finnodâh. Taat lii Ovtâstum staatâi uáinust hirmâd tuođâlâš äšši. Ramaphosa haldâttâs lii almottâm, et tuámmár áigu tutkâđ tábáhtusâid vuáđulávt.
Rand lâi vástuppeeivi korrâ teddui vyelni, tastko investisteeh láá huolâstum tast, et sujâttâs keežild Maadâ-Afrik puáhtá monâttiđ vuoigâdvuođâs peessâđ Ovtâstum staatâi markkânáid. Maadâ-Afrikist lii tääl máhđulâšvuotâ tuálvuđ tävirijd Ovtâstum staatáid tulittáá African Growth and Opportunity Act ‑laavâ vuáđuld.
Majemui kyevti ive ääigi rand lii mudoi-uv lamaš vaigâdis tiileest, já tot lii monâttâm masa 50 % jieijâs áárvust. Kesimáánu 4. peeivi 2021 kurssâ dollar vuástá lâi vala 13,35, mut tastmaŋa Maadâ-Afrik vaaluut lii hiäjusmâm čuuvtij, já taan oho tábáhtusâi tiet tot lii tääl aldanmin 20,00 rääji.
Käldeeh:
– US accuses South Africa of supplying arms to Russia (www.ft.com)
Kove: Karelien Kriel (Pixabay)