Euroviisui fiinaal uárnejui vyesimáánu 13. peeivi Liverpoolist Ovtâstum kunâgâskoddeest. Finalist fáárust lijjii 26 enâmid. Kišto vuoitij Ruotâ ovdâsteijee Loreen pittáin Tattoo. Sun finnij ohtsis 583 čyegisid. Nubben poođij Suomâ ovdâsteijee Käärijä, kote finnij ohtsis 526 čyegisid. Kuálmádin poođij Israel ovdâsteijee Noa Kirel pittáin Unicorn, mii finnij ohtsis 362 čyegisid.
Taat lii jo nubbe vuáittu Loreenân, ko sun vuotij kišto meiddei ive 2012. Talle kišto uárnejui Bakust Azerbaidžanist. Loreen lii tuše nubbe artist, kote lii vuáittám Euroviisuid kuohtii. Vuossâmuš lii irlandlâš lávloo Johnny Logan, kote vuoitij kišto iivij 1980 já 1987.
Käärijä puáđus lii Suomâ nubben pyeremus puáđus historjást, já puoh pyeremus puáđus suomâkielâlii lavlui. Suomâ vuoitij Euroviisuid ive 2006 eŋgâlâskielâg pittáin Hard Rock Hallelujah. Talle ovdâsteijen lâi hard rock ‑juávkku Lordi.
Käärijä pittá Cha cha cha lâi čielgâsávt keččei jiellâh. Keččei jienâstmist tot finnij 376 čyegisid, já 18 enâmid adelii toos tievâ čuággáid ađai 12 čyegisid. Ruátálâš pittá vuod finnij tuše 243 čyegisid keččein, ige tot finnim oovtâgin enâmist tievâ čuággáid. Loreen kuittâg vuoitij ubâ kišto, tastko sun finnij 190 čyegisid eenâb ko Suomâ raađij jienâstmist. Raađij já keččei čuággáh rekinistuvvojeh oohtân.
Keččei jienâstmist piergij uáli jo pyereest meiddei Taažâ ovdâsteijee Alessandra. Nuorâ italialâš-taažâ lávloo finnij keččein 216 čyegisid já poođij kuálmádin keččei jienâstmist. Raađij jienâstmist sun ij kuittâg piergim siämmáá pyereest, já tondiet sun poođij viđâdin ubâ kištoost Italia ovdâsteijee maŋa.
Puáttee ive Euroviisuh-lávlumkišto uárnejuvvoo Ruotâst. Tot lii jo čiččâd kerdi, ko Ruotâ uárnee kišto. Suomâ lii jo almottâttâm ive 2024 kiišton.
Käldee:
– Euroviisuh-lávlumkišto virgáliih siijđoh
Kove: Unif (Pixabay)