Tuurki parlament lii oovtâmielâlávt tuhhiittâm Suomâ Nato-jeessânvuođâ vástuppeeivi koskiijâ. Jienah adeluvvojii ohtsis 276. Turkki lii majemuš eennâm, mii lii ratifisistám Suomâ Nato-jeessânvuođâ. Ton ovdil Uŋgar ratifisistij Suomâ jeessânvuođâ vuossaargâ. Jeessânvuotâ Natost váátá puoh jeessânenâmij tuhhiittem.
Ton maŋa ko parlament lii tuhhiittâm Suomâ Nato-ratifisistmân kyeskee laavâ, ferttee president Recp Tayyip Erdoğan vala čäälliđ tom vuálá. Ton maŋa Turkki tooimât ratifisistempápárijd Washingtonân Ovtâstum staatâi olgoministeriö arkkâdâhân, já ratifisistemproosees lii vaalmâš. Uŋgar lii almottâm, et tot tooimât tuhhiittemäššikirje Washingtonân vástuppeeivi.
Ko ratifisistem lii vaalmâš jyehi 30 Nato-enâmist já ko enâmeh láá tuhhiittâm Suomâ jesânin suáldátliiton, te Nato njunošminister Jens Stoltenberg vuolgât Suomân jieijâs vuáláčäällim povdim servâđ Nato jesânin.
Olgominister Pekka Haavisto čáálá vuálá Suomâ servâmkirje, mii meid toimâttuvvoo Washingtonân.
Turkki já Uŋgar iä lah vala ratifisistám Ruotâ Nato-ucâmuš. Ton ratifisistem äigitavlu lii vala áávus.
Käldee:
– Turkin parlamentti hyväksyi Suomen Nato-jäsenyyden (www.is.fi)
Kove: Wilfried Pohnke (Pixabay)