Emma-gaala lii Suomâ stuárráámus muusiksyergi palhâšumetábáhtus. Taan ive Emma-gaala tollui moonnâm lávurduv njuhčâmáánu 7. peeivi Espoost. Tábáhtuumeest palhâšuvvojii ive 2025 pyeremuuh artisteh. Hildá Länsman já Tuomas Norvio vuoittijn Ive etno ‑palhâšume Dajan-skiäruinis.
Hildá Länsman já Tuomas Norvio jieijah iävá peessâm pääihi oolâ Espoon Emma-gaalan, tastko musikkárkyevtis láin konsertmääđhist Taažâst.
Hildá Länsman lâi uáli kijttevâš palhâšuumeest. Sun muštâlij Yle Säämi sahhiittâlmist, ete lii eromâš äšši, ete sämimuusik uážžu tággáár palhâšume. Länsman lâi meid váhá olâttum, ete suoi vuoittijn palhâšume etno-kategoriast, tastko sunnuu muusik ij lah eidu tijpâlâš folk- tâi aalmugmuusik, pic tom lii suu mielâst vaigâd pieijâđ maggaargin tiätu kategorian. Ton tááhust sunnuu skiärru lii viehâ ereslágán ko eres iävtukkâsâi muusik etno-katergoriast. Sunjin lâi eromâš äšši jo tot, ete suoi peesáin iävtukkâssân Ive etno ‑palhâšumán, já lâi vaigâd kuvâttâllâđ, ete suoi joba vuáitáččáin. Meid Tuomas Norvio lâi olâttum palhâšuumeest, eromâšávt tondiet ko Dajan lii eskin sunnuu vuossâmuš skiärru.
Hildá Länsmanist já Tuomas Norviost lii meid jo uđđâ skiärru pargo vyelni. Taan ive pessijái ääigi vist lii puátimin remix-skiärru, mast eres musikkáreh já jienâvuávájeijeeh láá ráhtám Dajan-skiäru pittáin uđđâlágánijd versioid.
Käldeeh:
– Etno Emma -bálkkašupmi manai Länsmanii ja Norvioi (yle.fi)
– Vuoden 2025 Emma-palkintojen voittajat – Emma Gaala 2026 (emmagaala.fi)
Kove: Jasmina Schreck