Uđđâ tutkâmuš mield dinosaurusšlaajâ Tyrannosaurus rex šoodâi hitásubbooht ko ovdil lâi jurdum. Ovdil totkeeh nobdii, ete tot šoodâi jotelávt, juuvsâi oles stuáruduvâs 25‑ihásâžžân já jaamij suullân 30‑ihásâžžân. Uđđâ taavtij analyys kuittâg čaaitij, ete nuuvt ij lamaš. Totkeeh čyevvejii maaŋgâahasij dinosaurusij jyelgitaavtijd polarisistee čuováin já kavnii siämmáálágánijd iheriäggáid ko muorâin láá. Iheriäggáh čaittii, ete ellee paasij maaŋgâ ihán siämmáástuárusâžžân, mutâ tiätu aaigij tot šoodâi jotelávt. Tutkâmuš mield Tyrannosaurus rex juuvsâi lopâlii stuáruduvâs eskin 40‑ihásâžžân já eelij suullân 45–50‑ihásâžžân.
Tutkâmuš váldučällee, Oklahoma ollâopâttuv paleohistolog Holly Woodward arvâl, ete dinosaurus šoddâm já ton liähtu lâi tuođânálásávt kiddâ raavvâd finniimist teikkâ eres pirâstahhein. Ađai jis äigi lâi vaigâd ige purrâmuš lamaš, te ellee ij kiävttám energia šoddâmân. Talle ko tile oppeet lâi pyereeb, te dinosaurus stuárui. Nuuvt tot ceevzij vädis aaigijn já šoodâi stuárráábin ko eres piätuelleeh.
Woodward iätá, ete veikkâ Tyrannosaurus rex lii tutkum jo čyeti ihheed, te taat dinosaurus ain toovât olâttâsâid paleontologáid. Suu mield vijđedum amnâstuv, uđđâlágánijd statistiikijd já tärhis tähtianalyys ovtâstitmáin uđđâ tutkâmuš fáálá čielgâsub já tärkkilub kove Tyrannosaurus rexist ellen, mii šadda nuorâ ellest jietânâssân. Tyrannosaurus rex lâi puoh aaigij stuárráámus enâmist iälustâm piätuellee. Tot šoodâi joba paijeel 12 meetter stuárusâžžân já teedij käävci tonnid.
Uđđâ tutkâmuš lii almostum Paleontology and Evolutionary Science ‑sijđoost.
Käldeeh:
– Tyrannosaurus rexillä oli erikoinen keino kasvaa jättikokoonsa (yle.fi)
– Study finds Tyrannosaurus rex did not reach full size until age 40 (www.reuters.com)
– New study reveals the T. rex didn’t reach full-size until age 40 (news.okstate.edu)
Kove: David Monniaux (Wikimedia Commons)