Etikuávdášlágádâs lii almostittám lovoid toho puáttám almottâsâin taan ive uđđâivemáánust kesimáánun. Taan ääigi Etikuávdášlágádâsân pottii ohtsis 1 247 050 etialmottâssâd, mii lii 6,3 prooseent ucceeb ko siämmáá ääigi moonnâm ive. Almottâsâi ucceeb mere čielgee eromâšávt tagarij almottâsâi kiäppánem, moh iä kuulâ Etikuávdášlágádâsân. Puoh almottâsâin tágáreh almottâsah lijjii suulân 239 920, mii lii paijeel love prosentid ucceeb ko ihe tassaaš.
Äšittemes almottâsâin 95 prosentid lijjii suáituh, main olmooš ovdâmerkkân ij tieđe, kuus sun kolgâččij suáittiđ. Tuše vittâ prooseent lijjii hettimsuáituh, já toi meeri lii-uv kiäppánâm jo kuttâ ive maŋaluvâi.
Etialmottâsâin 53 prosentid tolvuu toos, ete etikuávdáškoccee siirdij ääši ovdâskulij virgeomâhâžân. Aašijn 52 prosentid hoittái vuosâtipšo, 36 prosentid poolis, 7 prosentid sosiaaltoimâ já vittâ prooseent piäluštemtoimâ. Ko verdid ihán 2024, te sosiaaltooimâ pargoh lasanii 13 prosentáin, já vuosâtipšo pargoh vist kiäppánii 7 prosentáin. Poolis já piäluštemtooimâ pargomeeri pisoi siämmáá tääsist ko ovdil.
Etikuávdáškocceeh västidii 98 prosentân etialmottâsâin vuálá 30 sekuntist. Koskâmiärálâš västidemäigi lâi kuttâ seekunt. Ohtâ koccee västidij koskâmiärálávt 7,6 almottâsân tiijmest. Koccei pargomeeri lii kiäppánâm, tastko ive 2024 loho lâi 8,0 já ive 2023 joba 9,1.
Käldee:
– Hätänumeroon kuulumattomien ilmoitusten määrä laskussa (112.fi)
Kove: Santeri Viinamäki (Wikimedia Commons)