Laapi ollâopâttuv já Säämi máttááttâskuávdáá ohtâsii Reesuursvijses táiđuviermi ‑haavâst ráhtojii kyehti iskospitá rievâst, moin moobiilohtâvuotâ toimâččij meid meccikuávluin, eromâšávt Laapi vädis tiilijn. Riehâ puávtáččij kevttuđ ovdâmerkkân puásuituálust, mađhâšemsyergist, huolâttâs- já piäluštemtooimâst, mediasyergist já räjikocceemist.
Rievâ iskospittáin nubbe lii rahtum muorâst ärbivuáválávt já nubbe vist lastikist. Riehân kuleh kulmâ loová. Vuossâmuu loová siste lii elektroniik, já nube loová siste láá aggregaat já puáldámuš. Kuálmád loová lii väridum kevttee jieijâs täviráid. Loovái lasseen riehân kulá syejipoccee anten várás.
Iskospitáh láá uáinusist Laapi ollâopâttuv válduaulast čohčâmáánu 2.–12. peeivi ollâopâttuv ávusorroomääigi.
Rievâ lasseen haavâst tutkui juoŋâstem ovdedem já toohâm uđđâáigásâžžân. Ulmen lâi ovdâmerkkân uánidiđ ääigi, mon kuálásteijee kalga leđe jieŋâ alne, vâi sun luhostuuččij váddásub-uv tiilijn. Taat hokâttâlâččij meid nuorâb ulmuid juátkiđ äärbi. Konkreetlâžžân puáđusin taan tutkâmfáádást šoodâi juoŋâstem lummoraavâkirje, mii ij aainâskin vala lah luuhâmnáál internetist.
Reesuursvijses táiđuviermi ‑haahâ pieijui joton kesimáánust 2023, já tot nuuvâi porgemáánu loopâst. Ton ulmen lâi ovdediđ uđđâlágán innovaatio já pyevtittâsovdánem, mii išedičij arktisii kuávlu irâttâsâi šoddâmist já ovdánmist. Vuáđujuurdân lâi anneeđ ävkkin ärbivuáválijd tiäđuid já uđđâáigásii hammim. Haavâ budjet lâi 430 344 eurod, mast Euroop union ruttâdij 344 276 eurod ađai 80 prosentid.
Käldeeh:
– Mobiilitekniikkareen avulla verkkoyhteys erämaahan ja harvaanasutuille alueille (www.ulapland.fi)
– Haavâ viermiseminaar 20.8.2025 tme 10–11.30
Kove: Ninara (Wikimedia Commons)