Vuáládâhenâmij aaviseh čäälih tääl 24-ihásii olympiavuojâdeijee Sean Niewoldist, kote lii viijmâg finnim vuosmuu vuoijâmdiplomis. Taat lii nuuvt kočodum A-diplom. Niewold finnij diplomis eidu ovdil vuolgus Singapore MM-kištoid.
Táválávt A-diplom vuoijâmtiijmeh algâttuvvojeh 4,5–5-ihásâžžân. Tot, et olympiatääsnist ij lah vuoijâmdiplom, lii uáli epitáválâš. Mudoi-uv Vuáládâhenâmijn lii epitáválâš, jis párnást ij lah vuoijâmdiplom: statistiik mield masaba puoh škovlâpárnáin (97 %) lii aainâs-uv A-diplom. A-diplomân viggee vuoijâmtiijmeh pišteh ain 40 minuttid häävild, já diplom várás tarbâšuvvojeh koskâmiärálávt 75 vuoijâmtijmed. A-diplom lasseen vuoijâmškoovlah fäälih vala B- já C-diplom, moh láá vaigâduboh ko A, mut B já C juksâmân iä tarbâšuu siämmáá ennuv oppâtiijmeh.
Maid A-diplom iskosist kalga mättiđ?
A-diplom vuojâdeijest kalgeh leđe pihtâseh pajalist: kuhes puuvsah já kuhessuájápäiđi já čäcikammuuh. Sun kalga mättiđ čuávuváid aašijd:
- Njuškiđ njuolgâdin čáácán, tuolmâđ čääsi 15 sekuntid, vuoijâđ 12½ meetterid raddevuoijâm já puáttiđ meddâl čääsist;
- Puohčâliđ čáácán, vuoijâđ luvvijn kietâkiäsoin vittâ meetter raddekrooli vuoiŋâhánnáá, muáđoh čääsist;
- Puohčâliđ čáácán, vuoijâđ luvvijn kietâkiäsoin vittâ meetter čielgikrooli;
- Puohčâliđ čáácán, vuoijâđ vittâ meetter raddevuoijâm, kobđođ vittâ seekunt čuávji alne, vuoijâđ vuod vittâ meetter raddevuoijâm já toohâđ pelijorgettem kukkodâhakselist já tastoo kobđođ love sekuntid seelgi alne;
- Njuškiđ koppârušmáin čáácán, sundástiđ čääsi vyelni, vuoijâđ kulmâ meetter čääsi vyelni, vuoijâđ purjâskággá rääigi čoođâ, vuoijâđ 25 meetterid raddevuoijâm, mast lii ohtii juolgij oolâ vuáijum poonán, vuoijâđ 25 meetterid čielgivuoijâm, 25 meetterid raddevuoijâm já 25 meetterid čielgivuoijâm;
- Njuškiđ čáácán, tuolmâđ čääsi 60 sekuntid kieđâigijn já juolgijgijn iššeedmáin já juurrâđ siämmást kuohtii jieijâs pirrâ.
Mondiet diplom váilu?
Niewold diplomttesvuotân lii kale jiärmálâš čielgiittâs. Sun lii šoddâm Vuáládâhenâmijn, mut suu eeji pargo keežild sun lii pajasšoddâm Aldanuorttân já Tave-Afrikist. Tobbeen sun finnij škoovlâst vuoijâmtiijmijd, mut tobbeen iä lamaš vuoijâmdiplomeh tego suu pärnivuođâ päikkienâmist. Jo talle sun algâttij kištoivuoijâm. Sun maacâi Vuáládâhenâmáid 15-ihásâžžân, já talle sun njuolgist joođhij kištottâllâm ollâ tääsist. ”Ij kihheen kuássin koijâdâm must diplomijd”, sun čielgee. Nuorrân sun vuojâi ulâttâsâid, sun šoodâi Vuáládâhenâmij miäštárin, já sun joođhij ain vijđásubbooht EM-vuojâmáid já MM-vuojâmáid já valaba olympialáid.
Diplom váilum kuittâg kiivsedškuođij suu, já nuuvt sun te meridij haahâđ A-diplomis. Niewold muštâl, et motomeh uásih iskosist luhostuvvii älkkeht. Suu mielâst lâi älkkee ovdâmerkkân puohčâliđ rääigi čoođâ. ”Motomeh kale lijjii huolâst, et luhostuuččim-uv mun, tastko mun lam stuorrâ almai, mut puoh moonâi pyereest.” Suu mielâst čuuvtij váddásub lâi čielgikobđom: ”Mun lam viehâ lussâd, já tondiet mun illá pastam kobđođ. Oovce sekuntist mun kal jo vuájuškuottim”, sun čielgee.
Veik kobđom luhostui-uv olympiavuojâdeijest váddásubbooht, te sun liijká finnij A-diplomis. Sun povvâst, et sun haalijd vuoijâđ meid B-diplom, kohân sun vistig lii tuárvi hárjuttâllâm kobđom hooteel vuojâdemáldást. B-iskosist kalga jo pasteđ kobđođ 15 sekuntid.
Käldeeh:
– Olympisch zwemmer (23) haalt nu pas zijn A-diploma: ‘Ik zonk bijna tijdens het drijven’ (www.rijnmond.nl)
– Van A-diploma tot zwemvaardigheid: zwemmen in cijfers (www.sportenstrategie.nl)
– Diploma A (www.allesoverzwemles.nl)
– Standaard examenprogramma Nationaal Zwemdiploma B (www.allesoverzwemles.nl)
Kove: KeepActive Australia from Melbourne, VIC, Australia (Wikimedia Commons)