Kiemâjäävri kaavpugstivrâ lii meridâm jienâigijn 18–8 (1 kuárus), et tot ij ornii aalmugjienâstem pumppuvyeimilájádâsâin. Ton saajeest aalmugjesânij uáivileh selgâttuvvojeh koijâdâlmáin kesimáánust. Kaavpughaldâttâs meerrid ton siskáldâsâst.
Váhá vuálá 300 kaavpug ässein lijjii vaattâm, et kaavpug orniiččij aalmugjienâstem.
Maaŋgah airâseh pahudii, et kaavpugist já ässein ij lah tuárvi tiätu tast, et haldâttâs puávtáččij orniđ aalmugjienâstem. Ton lasseen jienâstem mávsáččij 90 000 eurod, ko vist aalmug uáivil seelvâtmist láá hälbibeh-uv vyevih.
Matti Torvinen (Čoonnâsmettum máhđulâšvuotâ) eeđâi, et airâseh vissásávt halijdeh kuullâđ aalmugjesânij uáivilijd já et sij čuávdih vyeimilájádâsääši vuoigâlij vuovijgijn.
Paula Alatalo (Vuáđusyemmiliih) muštottij, et pumppuvyeimilájádâsäšši lii eštuu stuorrâ äšši Kiemâjäävrist. Suu mielâst nettikoijâdâlmij hyenes peellin lii tot, et vuorâseh iä peesâ västidiđ toid.
Pirkka Aalto (Suomâ Ristâlâšdemokraateh) mielâst aalmugjienâstem čuolmân lii, et tot váátá puoh pumppuvyeimilájádâshaavâi lopâttem.
Juhana Kelloniemi (Vuáđusyemmiliih) smietâi, et puáhtá-uv pirâsvaikuttâsâi árvuštâllâmprosesân lyettiđ, ko irâttâsah mäksih tom jiejah.
Juha Pikkaraisii mielâst ličij hyenes äšši čonnâsuđ mottoom uáivilân jo tääl. Sun huámášitij, et puáhtáhân keevvâđ nuuvt-uv, et aalmugjienâstmist meid ”kale”-uáivil vuáittá.
Veikko Niemelä (Suomâ Kuávdášpiäládâh) lii ton uáivilist, et kaavpugstivrâ kolgâččij meridiđ vyeimilájádâsâi vuástá, tastko motomeh kieldah kevttih pieggâvyeimirustigijd.
– Lii-uv proojeekt innig mii kieđâin? Muu mielâst tot stivrejuvvoo Helsigist, sun suogârdij.
Sun čujottij staatâ haalun ovdediđ ruánáá energia rähtim.
Samuli Anttila
Käldee:
– Kemijärvi ei järjestä kansanäänestystä pumppuvoimaloista – Hankkeet repivät kuilua ihmisten välille paikkakunnalla (www.kotilappi.fi)
Kove: Q0ywo (Wikimedia Commons)