Sämitiggerääđi lii meridâm adeliđ 500 000 ruvnâd (suullân 42 500 eurod) Säämi ollâškoovlân Kuovdâkiäinust tave-eennâmlii ohtsâšpargoproojeekt Lohkanlihkku (anarâškielân luuhâmlukko) várás. Ääšist almottij Taažâ Sämitigge tiäđáttâsâstis.
Proojeekt ulmen lii rähtiđ digitaallii oppâmpirrâs sämiškoovlâi tave-, maadâ-, juulev-, nuorttâlâš- já anarâškielâ luuhâm- já čäällimmáttááttâs várás. Lohkanlihkku lii pargoniävvu, moin vaanhimeh já máttáátteijeeh pyehtih tuárjuđ párnáid luhâmist já čälimist. Tom pyehtih kevttiđ meiddei puárásuboh uáppeeh, kiäin láá luuhâm- já čäällimháástuh. Pargoniävvoin puáhtá lasettiđ párnái luuhâmmoovtâ, mii vuod vaaigut almolávt párnáá oppâmân já škovlâmiänástusân.
”Sämipárnááh ferttejeh tääl kevttiđ digitaallijd luuhâm- já čäällimpargoniävuid váldukielân, tastko sämikielâliih digitaalliih pargoniävuh váiluh, nuuvt et lii uáli jo pyeri ko tágáreh ráhtojeh tääl”, iätá sämitiggerääđi jeessân Maren Benedicte Nystad Storslett.
Käldee:
– Doarjja Interreg-prošektii nannen dihte lohkanmovtta (www.nrk.no)
Kove: StartupStockPhotos (Pixabay)