Gunnel Stenbäck, kote lâi tuođânálásávt Suomâ puárásumos olmooš, jaamij lávurduv skammâmáánu 30. peeivi Diakonissalágádâs tipšopääihist Helsigist. Ääšist muštâlii suu aldaulmuuh STT-uđâstoimâttâhân. Stenbäck eelij 110-ihásâžžân.
Elimis ääigi Stenbäck tooimâi Diakonissalágádâs rehtorin já hovdân sehe Rinnekoti-ovdánemváddulágádâs pajetipšon. Diakonissalágádâs hovdân sun ovdedij eromâšávt škovlim, ovdánemváddupargo, almoshaldâttuv já aalmugijkoskâsijd ohtâvuođâid. Stuárráámus uási eellimistis Stenbäck lâi aassâm Helsigist.
Stenbäck šoodâi Vuáskuenâmist čohčâmáánu 21. peeivi 1914, ađai ovdil ko Suomâst šoodâi jiečânâs staatâ. Sun čođâlditij pajeuáppeetotkos ruátálii lyseost Kotkast ive 1933. Siämmáá keesi Stenbäck uásálistij ristâlii kesičuákkimân Kokkolast. Ton maŋa sun algâttij uápuid Helsig Diakonissalágádâs pyecceitipšoškoovlâst ive 1934. Diakonissan Stenbäck valmâštui ive 1943. Ive 1956 sun väljejui Rinnekoti-ovdánemváddulágádâs pajetipšon. Ive 1969 sust šoodâi vistig Diakonissaopâttuv rehtor já muáddi ive ton maŋa Diakonissalágádâs hovdâ. Iäláttâhân Stenbäck paasij ive 1977. Kuhes elimis ääigi sun lâi kiergânâm eelliđ joba 50 enâmist.
Suomâ puoh aaigij puárásumos olmooš Maria Rothovius (1887−2000) eelij 112-ihásâžžân.
Käldeeh:
– Suomen vanhin teki harvinaisen uran (www.hs.fi)
– Sisar Gunnelin elämänkaari on ollut pitkä ja monipuolinen (www.hdl.fi)
– Diakonissalaitoksen johtajatar Gunnel Stenbäck eli Suomen vanhimmaksi – ”Valoisa ja määrätietoinen ammattilainen” (yle.fi)
Kove: Andreas Lischka (Pixabay)