Suomâ nisonij jyelgipállujuávkku piäsá uásálistiđ EM-kištoid 2025 Sveeicist. Taat čielgâi majebaargâ eehid speelâst Suomâ já Skotland kooskâst Helsigist.
Suomâ já Skotland spellii vuossâmuu speelâ Skotlandist Edinburghist vástuppeeivi skammâmáánu 29. peeivi. Ton speelâ puáđus lâi 0−0. Nuuvtpa playoff-speelâi majemuš spellâ Helsig Bolt Arenast čoovdij, kuábáš juávkku piäsá puáttee ive EM-kištoid Sveeicin. Speelâ čuovvuu pääihi alne paijeel 7 000 keččed. Suomâ algâttij kievrâht, já jo káávcád minuttist Natalia Kuikka čievčâstij vuossâmuu moolâ Suomân. Taan moolâ maŋa Skotland juávkku piejâi eenâb tiädu Suomâ molâkuávlun, mut ij luhostum finniđ moolâid. 27. minuttist Suomâ juávkku paajij nube moolâs, taan keerdi Nea Lehtola jyelgist. Meiddei nube uásist spellâ lâi uáli čovgâd, mut moolah iä innig šoddâm. Nuuvtpa Suomâ vuoitij speelâ Skotland vuástá 2−0 já piäsá spellâđ EM-kištoin puáttee ive. Nisonij jyelgipáálu EM-kištoh uárnejuvvojeh syeinimáánu 2.–27. peeivi 2025 Sveeicist. Kištoin láá fáárust juávhuh ohtsis 16 enâmist.
Meiddei almai vuálá 21-ihásij juávkku peesâi EM-kištoid
Skammâmáánu loopâst vist čielgâi, ete meid Suomâ almai vuálá 21-ihásij jyelgipállujuávkku piäsá spellâđ puáttee ive EM-kištoin. Playoff-speelâi nube kiärdust Suomâ speelâi Taažâ vuástá. Vuossâmuš spellâ spellui Tamperest, já Suomâ vuoitij tom 5−1. Veikkâ Taažâ pelestis vuotij päikkispeelâs Stavangerist 2−1, tot ij liijkágin rijttám peessâđ EM-kištoid tondiet ko Suomâ juávkku finnij ohtsis eenâb moolâid kyevti speelâst. Nuuvtpa Suomâ peesâi EM-kištoid, moh uárnejuvvojeh kesimáánu 11.–28. peeivi 2025 Slovakiast. Taat lii eskin nubbe tohe, ko Suomâ almai vuálá 21-ihásij jyelgipállujuávkku piäsá spellâđ euroopmiäštárkištoin. Vuossâmuu keerdi Suomâ lâi tain fáárust ive 2009.
Käldeeh:
– Näin Helmarit eteni EM-kisoihin – Suomen konkarit linjasivat juhlasuunnitelmansa (yle.fi)
– EM-KISOIHIN! – Pikkuhuuhkajien etumatka riitti Norjassa (www.palloliitto.fi)
Kove: Michal Jarmoluk (Pixabay)