Šielâ lii väljejum ive 2024 nommân, tieđeet Helsig ollâopâttâh. Vyeittee jienâstui Nomâttâstutkâmuš peeivij (suom. Nimistöntutkimuksen päivät) ääigi skammâmáánu 8. peeivi. Ive nommâ lii tubdâstâspalhâšume taggaar noomân, mii lii lamaš pyereest uáinusist jieškođe-uv ive ääigi. Palhâšume puáhtá uážžuđ mii ihenis jiešnoomâid, já ton juurdân lii luptiđ uáinusân šiev nommâvaljiimijd já noomâi adelem merhâšume ohtsâškoddeest. Ovdâmerkkân staatâ já kieldâi irâttâsâin já palvâlusâin tuáivojeh čielgâ, ášáliih já iberdettee noomah.
Šielâ lii Aanaar uđđâ škoovlâ nommâ. Tot vuoitij ávus nommâkišto moonnâm ive häämist Šiella, mut muttui maŋeláá háámán Šielâ. Nommâkisto vyeittee Inker-Anne Magga vuáđustij noomâ toin naalijn, et škovlâ lii skeŋkkâ párnáid já et Šiella suápá pyereest oohtân Sajosáin já Siidain. Taah siämmááh vuáđustâsah lijjii suijân toos, et Šielâ väljejui ive nommân. Škoovlâ nommân Šielâ lii meiddei uáli jo pyeri metafora, tastko šievšlaajâg škovlim lii ohtâ mávsulumosijn skeeŋkâin, mon puáhtá adeliđ párnážân. Ton lasseen anarâškielâlâš nommâ tiäddut páihálâšvuođâ já anarâškielâ kiävroo sajattuv.
Suomâkielân šielâ lii ”vastasyntyneelle annettava lahja, tavallisesti suoja-amuletti”.
Ive nommâ -jienâstmist nubben lâi Antti Järvinen, kote lii fiktiivlâš persovn Robin Packalen pittáást ”Häitä pidelly”. Uccâ nommâvaljiimist lâi jiešalnees stuorrâ merhâšume, tastko nommâ finnij ulmui huámmášume. Tast lâi-uv meiddei hitruus čuávumuš: kauhavalâš hejâkovvejeijee Antti Järvisii nettisiijđoin ellii ennuv eenâb ulmuuh ko táválávt.
Kuálmád saje juohhui Kiekko-Espoo já Posti kooskâst. Jieŋâskiärrujuávkku Kiekko-Espoo suomâkielâlâš nommâ suápá syemmilii kulttuurân pyerebeht ko ton oovdiš nommâ ”Blues”. Posti Group almottij čohčâmáánust 2024, et tot áigu ohtâlistiđ jieijâs irâttâsâi noomâid nuuvt ete puoh noomah siskeldeh sääni Posti. Posti-nommâ muštâl čielgâsávt, kii oomâst täid irâttâsâid.
Eres finalân peessâm noomah lijjii Aurora, Juuri & Juuri sehe Tiedemuseo Liekki. Jieŋâskiäru nisonij alemuu liiga uđđâ nommâ lii ”Auroraliiga”, mon lasseen Aurora lâi ive 2023 almolumos koskânommâ suomâkielâláid nieidáid. Päikkieennâmlijd ruotâsšaddoid puovtâdeijee Vihannes-Laitila uđđâ nommâ lii Juuri & Juuri, mon siskeldem sänisierâ (juuri = ruotâs; juuri já juuri = het-het) puáhtá išediđ ulmuid mušteđ tom. Tiedemuseo Liekki lii uđđâ nommâ Helsig ollâopâttuv museon. Nommâ puátá njuovčâtuulâst, mii lii ollâopâttuv tubdâlduvâst.
Ive nommâ -tubdâstâspalhâšume lii juohhum jo čiččii. Ive 2023 nommâ lâi Käärijä.
Käldeeh:
– Šielâ valittiin vuoden nimeksi (yle.fi)
– Inarin uuden koulun nimeksi valittiin Inarin koulukeskus Šielâ (www.inari.fi)
– Vuoden nimi on Šielâ (www.helsinki.fi)
– Vuoden nimi (blogs.helsinki.fi)
Kove: Marja-Liisa Olthuis