Vuáládâhenâmijn Edest De Sionkerk -kirkko lii kiddejum maaŋgâ ookon viärráás suámsurkivse keežild. Kirho väldidâm keđgineđeh láá suámsurkivse tyehin, čáálá Omroep Gelderland -lostâ. Puoh De Sionkerk -kirho tábáhtusah láá sirdum nube kiirkon suámsurčurgiimij ááigán.
”Suámsureh kávnojii kirhoost okko tassaaš. Kirhoost láá tääl mielâttes ennuv suámsureh”, muštâl sundee Jacolien Ros Omroep Gelderland -loostân. Sun muštâl, et meid sun lii käskittâttâm suámsuráid. ”Vissásávt eenâb-uv ulmuuh killájeh tääl suámsurij kääskistmijn, mut amahân te sij iä vaarâ tieđe, et tot lii tábáhtum kirhoost”, sun muštâl.
Sundee muštâl, et puáttee ohoi ääigi suámsurijd kalga hevâttiđ, já toos tarbâšuvvoo iše tiivrijd tuššâdeijee irâttâsâst. Aamnâs kalga vaiguttiđ tiätu ääigi, já tondiet kirkko lii kiddâ motomijd ohoid. Meiddei kirho káátu ferttee vuáđulávt čurgiđ, tastko keđgineđeh láá pessim káátu vuálá.
Keđgineđeh láá suojâlum piätuelleeh, nuuvt et taid ij uážu koddeđ. Kirkko liijká iirât vyejettiđ taid meddâl.
Keđgineđeh tovâtteh täävjib-uv vahâgijd. Taah piäđuh iä oro tuše luándust, mut meiddei siijdâin já kaavpugijn. Toi pooškah já kuužah tovâtteh hajâvädisvuođâid. Toi ijjâjiennâdmij keežild ulmuuh iä pissii uáđđiđ.
Keđgineđeh láá tobdoseh tast, et toh sättih huksiđ peesis meid auton já suoskâđ tobbeen rasta jotosijd.
Ive 2021 Vuáládâhenâmijn Gelderlandist 11 000 tálutuállud lijjii mottoom ääigi šleđgâittáá, tastko keđgineeti lâi peessâm siisâ ollâkeeldâsajattâhân já finnim šleđgâspiđgám.
Käldee:
– Kerk in Ede wekenlang dicht vanwege vlooienplaag door steenmarters (nos.nl)
Kove: ArjanH (Wikimedia Commons)