Suomâ EU-vaaljâpeivi lâi 9.6.2024. Puoh paijeel 18-ihásiih ožžuu jienâstiđ. EU-vaaljâin aalmugjesâneh jienâsteh uđđâ jesânijd Euroop parlamentân.
Taan kesimáánust Euroop parlamentân láá väljejum 720 jesânid. Ovdebáá parlamentpaje jesâneh lijjii 705. Parlamentist uážžuh leđe enâmustáá 750 jesânid. EU-enâmij aalmugjesâneh jienâsteh uđđâ jesânijd Euroop parlamentân. Vaaljah uárnejuvvojeh jyehi viiđâd ive, ađai vaaljah láá čuávuváá keerdi ive 2029.
Euroop parlament uđđâ jesâneh kieđâvušeh maaŋgâlávánijd tergâdis fáádáid, moh kyeskih politiikân, ekonomian já ohtsâškoodán. Uđđâ jesâneh láá fáárust aasâtmin uđđâ laavâid já nubásmitmin jo vyeimist leijee laavâid. Laavah vaigutteh ubâ EU:n. Jesânij pargon lii meiddei piäluštiđ Euroop union áárvuid. Olmoošvuoigâdvuođâi kunnijâttem, rijjâvuotâ, demokratia, täsiárvu já vuoigâdvuotâstaatâprinsiip kuleh EU árvoid. Ubâ parlament tuhhit EU budjet, já tot vákšoo ruuđâi kevttim. Ton lasseen parlament väljee Euroop komissio saavâjođetteijee já komissio jesânijd.
Suomâ uážui valjiđ 15 uđđâ jesânid Euroop parlamentân. Vaaljâin Aalmuglâš Kokoomus uážui enâmustáá jienâid já nelji saje parlamentân. Čižetlitto uážui nubben enâmustáá jienâid. Piäláduv saavâjođetteijee Li Andersson uážui 247 604 jiennâd, mii lii ulâttâs EU-vaaljâin Suomâst. Čižetlitto uážui kulmâ saje parlamentân. Suomâ sosialdemokraatlâš piäládâh, Ruánáá litto já Suomâ Kuávdášpiäládâh ožžuu kyehti saje. Oovtâ saje ožžuu Vuáđusyemmiliih já Suomâ ruátálâš aalmugpiäládâh. Suomâ uđđâ Euroop parlament jesâneh algâtteh pargoidis parlamentist 16.7.2024.
Käldeeh:
– Miten EU-vaalit järjestetään (elections.europa.eu)
– Tässä ovat Suomen uudet mepit (www.iltalehti.fi)
– He kahmivat eniten ääniä – Kakkossijalle yltänyt jäi kauas taakse Li Anderssonista (www.hs.fi)
Kove: OpenClipart-Vectors (Pixabay)