Aanaar nuorâistivrâ NuVa uážui Tave-enâmij ministerrääđist povdiittâs uásálistiđ Nordic-Baltic Youth Initiatives for a Better Future -tábáhtumán. Tábáhtume tárguttâssân lâi kieđâvuššâđ nuorâi jiešráđálâšvuođâ já alguid, maid nuorah lijjii iävtuttâm. Alguuh lijjii ideistum ohtuu teikkâ juávhust, mutâ meiddei kieldâ, eennâmkode tâi staatâ tääsist. Aanaar nuorâistivrâ uážui povdiittâs Aanaar Pride áánsust.
Aanaar nuorâistiivrâst väljejuin kyehti nuorâ, kiäh uásálistáččáin tábáhtumán. Nuorâkyevtis väljejuin ton mieldi, kii lâi lamaš enâmustáá fáárust Aanaar Pride já eres NuVa tábáhtuumij orniimist. NuVa saavâjođetteijee já váldustiivrâ ovdâsteijee pessáin uásálistiđ. Nuorâi fáárust lâi meiddei nuorâistiivrâ toorjâolmooš.
Tábáhtumán uásálistii nuorah Taažâst, Latviast, Liettuast já Suomâst. Aanaar nuorâistiivrâ lasseen Suomâst fáárun pottii nuorah Oulust já Tamperest. Uásálistein lijjii maaŋgâlágáneh tuávááh. Motomeh lijjii jieijâs kieldâ nuorâistiivrâst, mutâ fáárust lijjii meid tagareh nuorah, kiäh lijjii algâttâm ovdâmerkkân jieijâs irâttâs, teikkâ nuorah, kiäh uárnejeh eres nuoráid uáivildum tábáhtuumijd.
Tábáhtume lâi kyevtuáság. Vuosmuš uási lâi Latviast 21.–23.3. já nubbe uási Taažâst 30.5.–2.6. Kuohtuuh tábáhtumeh lijjii muádi peivi kukkosiih, já tobbeen puovtij uásálistiđ puohlágánáid pargopáájáid já hárjuttâssáid. Hárjuttâsah vuoijuu nuorâi alguid, mutâ saje adelui uđđâ ideaid-uv. Hárjuttâsâi lasseen tábáhtumán kuulâi meid ávus uápásmume eres nuoráid.
Latviast nuorah teivii Riikast, mii lii staatâ uáivikaavpug. Vuosmui hárjuttâsâi maŋa sij tastoo mađhâšii Siguldan, mii lii suullân 50 miinuut keččin Riikast. Siguldast sij ijâstâllii já lijjii fáárust pargopáájáin. Tobbeen ij lamaš siämmáá ennuv uáinimnáál ko Taažâst.
Taažâ uáivikaavpugist Oslost nuorah pessii uápásmuđ Oslo parlamenttáálun. Tobbeen nuorah pessii meid uáiniđ Oslo oopperatáálu, aalmuglâšmuseo, kirjerááju sehe eres soojijd Oslo kuávdáást, mutâ meid Hovedøya suolluu.
Hárjuttâsâi tárguttâssân lâi rähtiđ čuákánkiäsu šiev vuáháduvâin já meridiđ pyeremuu täävi ovdediđ uđđâ alguid. Nuorah pottii ton loppâpuátusân, ete ličij pyeri ovdediđ uđđâ alguid já muštâliđ tain sosiaallij mediai peht, vâi alguin ličij ävkki nuuvt maŋgáid nuoráid ko máhđulâš.
Koveh: Emma Gahmberg