Pegâlmâs muusikjuávkku Metallica lávdástij Suomâ Olympiastadionist vástuppeeivi (7.6.2024) já pasepeeivi (9.6.2024). Metallica lâi ovdil lávdástâm Suomâst 20 kerdid, main vuosmuš lâi ive 1984. Muusikjuávkku lâi moonnâm tove Suomâst ive 2019.
Metallica lii meetaalmuusikjuávkku, mii lii ráhtám muusik jo paijeel 40 ihheed. Metallica vuáđudui Ovtâstum staatâin ive 1981. Tom vuáđudáin lávloo já kitarist James Hetfield já rumbal Lars Ulrich. Metallica almostitij ohtnubálovváád studioalbumis 72 Seasons moonnâm ive cuáŋuimáánust.
Suomâ Olympiastadionist lijjii ohtsis 105 000 kuldâleijed, mii lii eenâb ko kuássin ovdil. Stadionist lâi kiävtust eresláván lyevdirááhtus ko táválávt, já tondiet tobbeen puohtii leđe eenâb kuldâleijeeh. Kuldâleijei miärán vaiguttij meiddei ”no repeat” -prinsiip, mon mield pasepeeivi konsertist Metallica čuojâttij eres pittáid ko vástuppeeivi konsertist. Tienuuvt ulmuuh halijdii puáttiđ kuohtui peeivij.
Muusikjuávhu basist Robert Trujillo já kitarist Kirk Hammet čuojâttáin oovtâst Pelle Miljoona pitá Olen kaunis. Ovdebáin konsertijn Suomâst Metallica lâi čuojâttâm Popeda já Hassisen kone pittáid.
Käldeeh:
– ”Ihan ok” – Yleisö seisoi halvaantuneena, kun maailman suurimman metallibändin keikka lässähti (www.hs.fi)
– ”Se on Metallica kuitenkin” (www.hs.fi)
– Metallica esitti Pelle Miljoonaa ja teki stadionin yleisöennätyksen (www.hs.fi)
Kove: Library of Congress Life (Wikimedia Commons)