”Liihân tot lamaš aaibâs hävski, jiem mun tieđe”, Elle-Máárjá Siltala iätá, ko mun koijâdâm tobdoid.
Elle-Máárjá Siltala lii vuossâmuš uáppee, kii lii čođâldittám vyeliškoovlâ anarâškielân Avveel škoovlâst. Elle-Máárjá enni Niina Aikio-Siltala lii ilolâš nieidâs anarâškielâlii škovlâpálgást, mutâ tääl tom ij innig siämmáánáál pyevti juátkiđ.
”Mun lam ilolâš já čiävláá jieččân nieidâst. Mun lam meiddei ubâ siärváduv peeleest ilolâš tast, ete vyeliškoovlâ puáhtá čođâldittiđ anarâškielân meiddei Avelist. Já pyeri, ete Avveel anarâš párnááh láá täsiárvusiih Aanaar anarâš párnáiguin.”
Anarâškielâlii párnáást háástuh láá lamaš, aaibâs tego ereskielâlijn.
”Ellis lii eenikielâlâš, nuuvt ete háástuh láá vaarâ lamaš siämmáálágáneh ko eres-uv maaŋgâkielâg perruin. Já motomin ličij lamaš älkkeb, jis pärni ličij lamaš suomâkielâ luokkaast, mutâ mij ep toho vuálgám.”
”Taan peeivi tiäđui mield eenikielâ luokka juátkoo, mutâ Avelist ij pyevti ollásávt juátkiđ anarâškielâlii máttááttâsâst. Tiet lii tiäđust-uv hirmâd stuorrâ šaali, mutâ mun keččâlâm iberdiđ kieldâ uáinu taan áášán. Mij ep vuálgám ubâ vaattâđgin tom tien tááhust, ko mij tiettip, ete Ellis ličij áinoo uáppee anarâškielâlii luokkaast. Sun mana tastoo suomâkielâ máttááttâsân, peic vaarâ matematiik já eenikielâ máttááttâs láá anarâškielân. Mij lep tuhhiittâm taam tile tienávt. Muoi leen kuittâg motomij vaanhimijguin hundâruššâm tom, ete jis sun monâččij Anarân škoovlân, já toin naalijn sun pesâččij ollásávt anarâškielâlii máttááttâsân. Tot ij lah kuittâg mii perrui hirmâd šiev muulsâiähtu, tastko mij aassâp Kiđđâjäävrist. Škovlâmätki ličij liijkás kukke.”
Niina Aikio-Siltala lii kuittâg tuđâvâš toos, ete suu páárnáš lii puáhtám čođâldittiđ vyeliškoovlâ anarâškielân.
”Já mun lam tuđâvâš toos já kijttevâš tast, ko Avelist lii lamaš tohálâš máttáátteijee ubâ vyelitääsi ääigi. Já tiäđust-uv takkâ Avveel škoovlâ máttáátteijeid já pargeid šiev pargoost. Já eres vaanhimáid tagareh tiervuođah, ete valjiđ peri sämikielâlii máttááttâs ain ko tot lii máhđulâš. Veikkâ tot ij lah puoh älkkeemus kiäinu, te mun oskom, ete palhâšume puátá maŋeláá.”
Kove: Tuuli Paadar