Sämitige stivrâ meridij čuákkimstis cuáŋuimáánu 29. peeivi, ete tot addel jieijâs torjuu toos, ete stiivrâ jesâneh vuáláčäälih oovtâst olmoošvuoigâdvuotâväidim OA olmoošvuoigâdvuotâkomitean ääšist, mii kuáská vaaljâluvâttâlmân já valjáid.
Olmoošvuoigâdvuotâväidim kuáská alemuu haldâttâhrievti (AHR) 27.3.2024 adelem miärádâssáid Sämitige vaaljâluvâttâlmist já sämitiggevaaljâin. AHR meridij merkkiđ 65 olmožid Sämitige ive 2023 vaaljâluvâttâlmân Sämitige orgaanij miärádâsâi vuástásávt já orniđ sämitiggevaaljâid uđđâsist.
– Sämitigge piälušt algâaalmugvuoigâdvuođâi nanodem kuhes linjá. Sämitige stivrâ addel torjus olmoošvuoigâdvuotâväidimân. Tot lii uási jotkuumist, mast láá maŋgii pahudâm, ete Suomâ luávkkáá aalmugijkoskâsijd olmoošvuoigâdvuotâsopâmušâid Sämitige vaaljâluvâttâllâmääšist, iätá Sämitige saavâjođetteijee Pirita Näkkäläjärvi.
OA olmoošvuoigâdvuotâorgaanáid puáhtá toohâđ ohtâgâsväidimijd priivaat olmožin teikâ priivaat ulmui juávkun kullen, jis uáiná, ete lii luávkkájum miinii tähidum vuoigâdvuođâid, mii lii almottum OA olmoošvuoigâdvuotâsopâmušâin tâi toi valjimiävtulijn pevdikiirjijn.
– Sämitige stivrâ tuárju ohtâgâsväidim toohâm, tastko AHR majemuuh čuávduseh luávkkájeh sämmilij jiešmeridemvuoigâdvuođâ algâaalmugin, iätá saavâjođetteijee Näkkäläjärvi.
Meiddei Sämitige tievâsčuákkim savâstâlâi 12.4.2024 AHR majemuin čuávdusijn. Čuákkim eenâblovo čielgâ uáinu lâi, et koččâmuš lii algâaalmugvuoigâdvuođâi já olmoošvuoigâdvuođâi luávkkáámijn.
Iivij 2019 já 2022 OA olmoošvuoigâdvuotâkomitea já näliolgoštem vuástásâš komitea (CERD) adelii Suomân laŋgâtteijee čuávdusijd sämitiggelaavâ tulkkuumist já kenigittii Suomâ tärhistiđ, et laahâ kunnijât sämmilij jiešmeridemvuoigâdvuođâ.
Käldeeh:
– Sámedikki stivralahtut váidet olmmošvuoigatvuođakomiteai Sámedikki válgalogahallama ja válggaid guoski áššis (yle.fi)
– Sämitige stivrâ tuárju olmoošvuoigâdvuotâväidim toohâm ääšist, mii kuáská valjâluvâttâlmân já valjáid (samediggi.fi)
Kove: Ville-Riiko Fofonoff / Sámediggi | Saamelaiskäräjät