Halijdah-uv oppâđ já sárnuđ sämikielâ Helsigist puáttee keesi? Tääl tot lii máhđulâš!
Helsig kuávlu kesiollâopâttâh (Helsingin seudun kesäyliopisto) uárnee vuosmuu tove historjást anarâškielâ keevâtlii kesikuursâ Helsigist. Kurssâ uárnejuvvoo syeinimáánu kyevti majemuu oho ääigi (15.7.–24.7.) eehidmáttááttâssân. Kuursâ ulmen lii hárjuttâllâđ kielâ sárnum já luuhâm, já toos láá väridum 28 máttááttâstijmed.
– Tyellittälli lii koijâdâllum, et mondiet Helsigist ij lah kuássin anarâškielâ máttááttâs. Mun halijdim taan keesi orniđ tággáár máhđulâšvuođâ. Halijdâm jieš-uv leđe Helsig kuávlust puáttee keesi, nuuvt et ton peeleest tággáár kurssâ heivee muu kesiohjelmân uáli pyereest, illood kuursâ máttáátteijee Marja-Liisa Olthuis.
– Taat kurssâ lii huksejum jiečânâs kurssân, adai tot ij tagarin njuolgist västid mongin oppâlágádâs anarâškielâ kuursâ. Juurdân lii nonniđ sämikielâ argâpiäiválii kielâtááiđu. Mut amahân te anarâškielâ máttáátteijeigijn ráđádâlmáin oosijd tast puávtáččij luuhâđ pyerrin mottoom anarâškielâ uápun, arvâl Marja-Liisa Olthuis.
Kuursân almottittem lii tääl áávus. Kuursâ hadde lii 120 eurod. Máttááttâs uárnejuvvoo aldamáttááttâssân. Kuursâ täärhib tiäđuh já almottittemliŋkkâ kávnojeh tääbbin.
Kove: Suomen Ilmakuva Oy