Sveeici ovdâsteijee Nemo lii vuáittám ive 2024 Euroviisuid pittáin The Code (Koodi). Kišto uárnejui Malmöst Ruotâst. Pittá finnij ohtsis 591 čyegisid, main 226 adelii kišto keččeeh já 365 äššitobdeerääđih pirrâ Euroop.
Nubben poođij Kroatia (547 čyegisid) já kuálmádin Ukraina (453 čyegisid). Kroatia finnij enâmustáá keččei jienâid, mutâ ko Sveicci finnij uáli jo ennuv raađij jienâid, te vyeittee lâi čielgâs.
Suomâ ovdâsteijee Windows95man ađai Teemu Keisteri já lávloo Henri Piispanen láin 19. saajeest. Suoi uásálistijn kiišton pittáin ”No rules”. Keččein suoi finnijn 31 čyegisid, mutâ raađijn tuše 7 čyegisid. Ruotâ lâi kišto oovcád, já Taažâ paasij majemužžân.
Euroviisuh selvâttuvvojii meiddei taan ive kyevti sämikielân. Anarâškielâ selvâtteijen lâi Heli Huovinen já tavesämikielâ selvâtteijen Aslak Paltto. Taan ive sämikielâ selvâttem lâi máhđulâš keččâđ já kuldâliđ meiddei Ruotâ peln.
Taat lâi jo niäljád ive maŋaluvâi, ko Suomâ peesâi semifinalist kidâ fiinaal räi. Suomâ lii maŋgii lamaš aaibâs kišto loppâkeejist, jis lii ubâ peessâm finalângin. Meiddei eres enâmeh luottii syemmilij táiđoid taan ive. Ovdâmerkkân Pyroman-nommâsâš irâttâs Espoost vuávái čuovâid Kroatia lávdástem várás. Ton lasseen Albania ovdâsteijee lávdástem lâi vuávám uásild syemmilâš juávkku, já lyeve alne lijjii syemmiliih tánssájeijeeh já láávlu máttáátteijee lii meiddei syemmilâš.
Taan ive Euroviisuin kullui meiddei algâaalmugmuusik. Australia ovdâsteijen lâi Electric Fields -juávkku ađai Zaachariaha Fielding já Michael Ross. Fielding láávlui One Milkali (Ohtâ vorrâ) uásild yankunytjatjarakielân já uásild eŋgâlâskielân. Taat lâi vuossâmuš tohe Euroviisui historjást, ko Australia aboriginaalkielâ lii kullum läävdi alne. Yankunytjatjarakielâ lii uhkevuálásâš kielâ já tááláá ääigi tuše muáddi čyeđe olmožid sárnuh taam Anangu aalmug kielâ. Pittáást Garwa já Butchulla aalmugân kullee musikkár Fred Leone čuojâttij yidaki (motomin kiävttoo meiddei nommâ didgeridoo) – meiddei vuossâmuš tove Euroviisui historjást. Veikkâ Australia ij peessâm finalân, te Zaachariaha Fielding lâi tuđâvâš toos, ete sun peesâi ovdâstiđ Australia já jieijâs aalmug taggaar kištoost.
Ive 2025 Euroviisuh-lávlumkišto uárnejuvvoo Sveeicist vyesimáánust.
Käldeeh:
– Brutal early exit for Australia at Eurovision 2024 (www.news.com.au)
– Making history at Eurovision: but Australia’s euro-journey ends here, for now (www.sbs.com.au)
– Switzerland’s Nemo wins the Eurovision Song Contest 2024 (eurovision.tv)
– Windows95man sijoittui yhdeksänneksitoista – katso miten Suomen tuomariston ja yleisön pisteet jakautuivat (yle.fi)
Kove: ktphotography (Pixabay)