Áimutiettuu lájádâs lii lopedâm sälttipuolâšijd ubâ riijkân já adelâm penttâ puolâšváruttâs. Puolâš puáhtá kulloo leđe motomij soojij joba 25–35 cekkid. Mun ferttiim ettâđ, et vistig tot oroi jo huávrin. Tälvikyevdilist sáttá leđe puolâš, já tot kulá áášán siämmáánáálá ko muottuuh já skammâ-uv. Lii-uv miinii muttum taan maailmist, ete táválii tälvisijvoost kalga váruttiđ sierâ? Já ko te váhá smietâdim, te kalehân tast jo pottii mielân muáddi ääši. Vistig-uv mun luuhim lase, já jis fakkist kalmeet 10–20 ceehi kolmâsubbon ko táválávt, te amahân tot vaaigut maaŋgâ áášán kost peri maailmist. Já nubben, ulmuuh eromâšávt mäddin iä lah veltihánnáá kuássin eellimstis feerim taggaar täälvi, mii lâi tobbeen-uv táválâš aainâs-uv vala 1900-lovo loopâst. Iäba toh tälvišooŋah lah kulloo tavveengin lamaš innig siämmáánáálá ennustmist ko ovdil, já tast láá puárásub sämmiliih sárnum jo paijeel 20 ihheed.
Já veikâ táálui ulguubeln tälvi ličij-uv ain siämmáš ko ovdil, te mij lep muttum já eellim lii muttum čuuvtij jo tai 20 ive siste-uv. Ain stuárráb uási mist puohâin pargeh já viettih eellim enâmustáá táálui já rakânâsâi syejeest, te mahtpa mij huámášiččijm teikâ tubdâččijm šooŋâid já mátáččijm rahttâttâđ siämmáá pyereest ko ovdil.
Ijge ”ovdilgin” ain puoh moonnâm tegu koolgâi: masa ubâ Aanaar kieldâ orostij sajasis 50 ceehi puolâšij tiet ive 1999 aalgâst, forgâ eidu 25 ihheed tassaaš. Mun lijjim talle 13-ihásâš, lijkkojim eenâb kirjijd ko saveháid já lijjim tuše iiloost ko jiem tarbâšâm moonnâđ škoovlân ijge kihheen karbâm olgos “navdâšiđ riskâááimust”. Tommittáá mun muštám ton ääigist já lam kuullâm já luuhâm, ete maaŋgâ moodeern táálust pieđgânii čäcipocceeh ko lieggiittem cuovkkânij šleđgâpotkânem tiet. Tot šoodâi maaŋgâ tálutuálun tivrâsin. Ubâ kieldâ lijjii jo valmâšeh evakuistiđ-uv, jis šleeđgâ ij finniiččii forgâ.
Jis historjálávt smiättá, te talle ij lamaš vala hirmâd kuhháá tast, ko majemuuh fastâ assum tááluh Aanaar kieldâst lijjii finnim šleeđgâ 1980-lovvoost. Mii ton maŋa nubástui eellim oornigist eromâš kolmâ tiilij iähtun, já lii-uv puoh tääl pyerebeht? Lep-uv mij Suomâst tuođâi arktisii mättim njunošrijkkâ tääl, tegu rijkkâimago rähteeh rámmojeh – já lii-uv mist ain Säämist jieččân ärbitiätu já -táiđu piergiđ korrâ tälvitiilijn? Ušom mij lep ain eenâb já eenâb šleđgâ- já vyeimilájádâsâi kieđâkeččeeh, vâi mii jyehipiäiváliih piergâseh tuáimih, tááluh lieggâneh já čääci kolgá. Ijge tot lah hyeni, ete mist láá piergâseh já rustigeh iššeen. Tááláá tavekuávlu piergimtiätu já -táiđu tiättojeh-uv vissâ tääl tast, ete mij mättip leđe váruguboh já muštottiđ tast, ete tälvikyevdilist sáttá tuođâi puolâštiđ.
Neeta Jääskö
Kove: Fabrizio Brecciaroli