USAst lii nube tove olmooškode historjást sirdum šave váimu ulmuu roopân. Návt almottuvvoo Maryland ollâopâttuv pyecceiviäsu tiäđáttâsâst.
Čuopâdâs tohhui koskoho, já vástuppeeivi adelum tiäđáttâs mield 58-ihásii Lawrence Faucette puáránem lii vuálgám pyereest joton.
”Sun vuáiŋá jieš, já suu váimu tuáimá išepiergâsijttáá”, tiäđáttâsâst muštâluvvoo.
Faucette kierdâi kuhás ovdánâm vorrâsuonâtaavdâst, mondiet táválâš orgaansirdem ij lamaš sunjin máhđulâš. Almai jieš muštâlij tiäđáttâsâst, et šave vááimu sirdem sunjin lâi suu áinoo máhđulâšvuotâ pissoođ jiegâin.
Maryland ollâopâttuvlâš pyecceiviäsu siirdij vuosmuu keerdi historjást šave vááimu ulmui uđđâivemáánust 2022. Talle-uv čuopâdâs luhostui pyereest, mut 57-ihásâš David Bennett jaamij kyehti mánuppaje maŋeláá. Bennett tiervâsvuotâ lâi hyeni jo ovdil čuopâdâs, já suu roopâst lijjii maaŋgah kudduumeh. Jäämmimsuijân lâi arvâlmij mield šave virus, mii lâi pessim vááimun já mii ij huámmášum ovdil vááimu sirdem.
Čuopâdâsâin, main monnii ellee kođos sirdoo ulmui, lii ain stuorrâ riskâ toos, et ulmuu roppâ hilgoškuát omâs kođđoos tâi orgaan.
Maryland ollâopâttuvlii pyecceiviäsu váimusirdemijn čuolmâ lii irâttum čovduđ toin naalijn, et čuopâdâsâin kiävttojeh geeninubástittum šovij vááimuh.
Faucette tile čuávvoo tárkká, já čuávuvááh ohoh láá kriittisiih suu selvânem tááhust. Faucette kálgu Anni iätá, et sunnuu áinoo tuoivân ličij finniđ laseääigi, čokkáđ já juuhâđ käähvi oovtâst.
Čuopâdâsah, main ellei kođoseh tâi orgaaneh sirdojeh ulmui, kočoduvvojeh ksenotransplantaation. Toh tuáivu mield pyehtih iše toos, et luovâttum olmoošorgaaneh láá ain vääniht.
Käldeeh:
– Maryland surgeons perform second pig heart transplant, trying to save a dying man (www.cbsnews.com)
– Ihmiselle asennettiin toista kertaa sian sydän Yhdysvalloissa, edellinen potilas kuoli (www.hs.fi)
Kove: Engin Akyurt (Pixabay)